Александр Шевченко Алмати турнирида Михаил Кукушкиндан устун келди

ALMATY. Kazinform – Қозоғистоннинг иккинчи, дунёнинг 61-ракеткаси Александр Шевченко Алмати АТР 250 турнирининг иккинчи босқичига йўл олди.

Қозоғистонлик теннисчи биринчи босқичда саралаш баҳсларидан сўнг мусобақага қўшилган 111-ўриндаги ҳамюрти Михаил Кукушкин билан куч синашди.

Икки қозоғистонлик теннисчи ўртасидаги баҳс икки тай-брейкда ҳал бўлди – 7:6 (7:5), 7:6 (7:4). Ғалаба Шевченкога насиб этди.

Икки соату 23 дақиқа давом этган шиддатли баҳсда Шевченко 8 та эйс амалга оширди ва 10 та брейк-пойнтдан 2 тасини қайд этди. Кукушкин 4 эйс, 2 брейк (4 брейк-пойнт) билан ажралиб турди.

Александр Шевченко чорак финалга чиқиш учун рейтингда 139-ўринни эгаллаб турган россиялик Аслан Карацев билан беллашади.

Эслатиб ўтамиз, аввалроқ Бейбит Жуқаев Алмати турниридаги илк ғалабасини қўлга киритгани ҳақида ёзган эдик.