Тоқаев: Қозоқ ва мўғул халқлари Буюк дашт цивилизациясининг ворислари

ULAN-BOTUR. Кazinform – ҚР Президенти Мўғулистон Президенти билан кенгайтирилган таркибда музокаралар ўтказди, деб хабар беради Ақорда.

Қасим-Жомарт Тоқаев ва Ухнаагийн Хурэлсух икки мамлакат делегациялари аъзолари иштирокида кенгайтирилган таркибда музокаралар ўтказди.

Қозоғистон Президенти кичик гуруҳдаги учрашув якунларини юқори баҳолади ва Мўғулистон билан давлатлараро муносабатларни янада ривожлантиришнинг устувор йўналишларини белгилаб берди.

“Қозоқ ва мўғул халқлари Буюк дашт цивилизациясининг ворисларидир. Ҳамкорликни янги стратегик босқичга кўтариш ҳар икки давлат манфаатларига мос келади. Биз мўғул халқига катта ҳурмат билан қараймиз ва Мўғулистон муваффақиятларидан доимо хурсандмиз. Айни пайтда сизнинг ташаббусингиз билан кенг кўламли сиёсий, иқтисодий ва ижтимоий ислоҳотлар амалга оширилмоқда. «Vision-2050», “Озиқ-овқат таъминоти ва хавфсизлиги”, “Соғлом мўғул халқи” каби муҳим давлат дастурлари амалга оширилмоқда”, – деди ҚР Президенти.

Қасим-Жомарт Тоқаев мамлакатлар ўртасида парламентлараро ва ҳукуматлараро яқин алоқалар ўрнатилганини эслатиб, ҳамкорликни мустаҳкамлаш учун катта имкониятлар мавжудлигини таъкидлади.

“Савдо-иқтисодиёт, қишлоқ хўжалиги, транспорт-логистика, тоғ-кон саноати, саноат, сармоя, янги технологиялар, космик ўзлаштириш каби соҳаларда ҳамкорликни фаоллаштириш зарур. Бугун имзоланадиган ҳужжатлар сиёсий ва иқтисодий телекоммуникациялар ривожига янги суръат бағишлайди, деб ўйлайман”, – деди Президентимиз.

Қасим-Жомарт Тоқаев икки давлат ҳукуматлари эришилган келишувларни ўз вақтида ва сифатли амалга ошириши керак, деб ҳисоблайди.

Бундан ташқари, Давлат раҳбари маданий-гуманитар алоқаларни мустаҳкамлаш муҳимлигини таъкидлаб, мўғулистонлик спортчиларга Астана шаҳрида бўлиб ўтган V Бутунжаҳон кўчманчилар ўйинларида қатнашгани учун миннатдорлик билдирди.

Қасим-Жомарт Тоқаев Қозоғистон мўғул талабалари учун квоталар сонини оширишга тайёрлигини маълум қилди. Шунингдек, у икки мамлакат олимларини умумий бой тарихий меросимизни биргаликда ўрганишга таклиф қилди.

Бундан ташқари, Президент экологик, тарихий, этнографик ва иқтисодий туризм йўналишларида ҳамкорлик қилиш учун катта имкониятлар мавжудлигини таъкидлади.

“Қозоғистон туроператорлари мўғулистонлик сайёҳларни Хўжа Аҳмад Яссавий мақбараси жойлашган қадимий Туркистон шаҳри билан таништириши мумкин. Чингизхоннинг тўнғич ўғли Жўжи хоннинг қабри жойлашган Улитау вилояти ва бошқа сайёҳлик жойларини кўрсатиши мумкин. Шунингдек, биз Мўғулистон билан Олтой туризм кластерини ривожлантириш, умумий сайёҳлик йўналишларини шакллантиришдан манфаатдормиз”, – деди Давлат раҳбари.

Қасим-Жомарт Тоқаев Мўғулистон Президентини келаси йили давлат ташрифи билан Қозоғистонга таклиф қилди.

Ўз навбатида, Ухнаагиин Хуралсух Мўғулистон Қозоғистон билан икки томонлама муносабатларнинг барча йўналишларини мустаҳкамлаш тарафдори эканлигини тасдиқлади. Бугун эришилган келишувлар икки давлат муносабатларида янги саҳифа очишига ишонч билдирди.

Ухнаагийн Хурэлсух Қозоғистон Мўғулистоннинг муҳим ҳамкори, шунингдек, Шарқ ва Ғарб ўртасидаги олтин кўприк эканлигини таъкидлади. Унинг сўзларига кўра, Улан-Ботир Қозоғистоннинг иқтисодий ривожланиш тажрибасига эътибор қаратмоқда. Шу билан бирга, савдо, транспорт-логистика, қишлоқ хўжалиги, космик тадқиқотлар каби соҳалардаги икки томонлама лойиҳаларни самарали амалга оширишга алоҳида эътибор қаратилмоқда. Хусусан, Ухнаагийн Хурэлсух Қасим-Жомарт Тоқаевнинг икки мамлакат ўртасидаги товар айирбошлаш ҳажмини 500 миллион долларга етказиш таклифини қўллаб-қувватлади.

Музокаралар якунида давлат раҳбарлари стратегик шериклик ўрнатиш тўғрисидаги қўшма декларацияни имзоладилар. Сўнгра имзоланган ҳужжатларни алмашиш маросими бўлиб ўтди.

Бундан аввал 28-29 октябрь кунлари Президент Қасим-Жомарт Тоқаев давлат ташрифи билан Мўғулистонда бўлиши ҳақида хабар берган эдик.

Давлат раҳбари Президент Ухнаагийн Хурэлсух билан музокаралар ўтказади. Шунингдек, у Мўғулистон Буюк Давлат Хурали Раиси Дашзэгвийн Амарбаясгалан ва Бош вазир Лувсаннамсрайн Оюун-Эрдэнэ билан учрашади. Минг йиллик тарихга эга икки халқ ўртасидаги муносабатлар бугунги кунда турли соҳаларда яхши даражада ривожланмоқда. Икки давлат раҳбарларининг навбатдаги учрашувида сиёсий ва иқтисодий алоқаларни мустаҳкамлаш масалалари муҳокама қилиниши, қатор музокаралар ўтказилиши мумкинлиги маълум қилинди.