Осиё теннис федерацияси директорлар кенгаши аъзолари илк бор Астанада йиғилишди
ASTANА. Кazinform - Астана шаҳрида илк бор Осиё теннис федерацияси директорлар кенгашининг йиғилиши бўлиб ўтди ва унда Хитой, Ҳиндистон, Корея Республикаси, Ўзбекистон, Камбоджа, Покистон, Туркманистон, БАА, Саудия Арабистони, Малайзия, Сингапур, Гонконг, Иордания ва Қозоғистон вакиллари иштирок этди.
Кун тартибида муваффақиятли ривожланишнинг учта асосий шарти муҳокама қилинди: инфратузилмани яхшилаш, мураббийлик салоҳиятини ошириш ва яхши молиялаштириш зарурати.
Осиё теннис федерацияси президенти Юрий Польский бундай учрашувнинг ўтказилиши катта шараф эканини таъкидлади.
“Қозоғистон кўплаб Осиё мамлакатлари учун муваффақиятли ривожланиш намунасидир. Ўтган 17 йил давомида эришган ютуқларимиз изчил меҳнат ва сармоя эвазига нималарга эришишимиз мумкинлигини кўрсатмоқда. Икки кун давомида директорлар кенгаши аъзолари Осиёда теннисни ривожлантириш стратегияси, мамлакатлар ўртасидаги алоқаларни мустаҳкамлашда қўлланилиши мумкин бўлган устувор вазифалар ва ташаббуслар ҳақида сўз юритди. Қитъанинг энг яхши теннисчилари учун янги турнирлар ташкил этиш, ёш теннисчиларнинг ёшлар босқичидан профессионал даражага ўтишларига кўмаклашиш масалаларини муҳокама қилишди. Делегатлар Beeline Arena миллий теннис маркази ва “Даулет” теннис марказига ташриф буюриб, болалар Қозоғистонда қандай машғулотлар ўтказаётганини кўришди ва мураббийлар билан суҳбатлашди. Директорлар кенгаши номидан Қозоғистон теннис федерацияси президенти Болат Ўтемуратовга алоҳида миннатдорчилик билдираман. Халқаро теннис федерацияси вице-президенти сифатида у теннис ривожланишининг дастлабки босқичидаги давлатлар учун тенг имкониятларга эришиш, тажриба алмашиш, турнирларда кўпроқ иштирок этиш ва ёшлар билан ишлашни яхшилаш борасидаги ташаббусларимизни доимо қўллаб-қувватлаб келади”, — деди Ю.Польский.
Директорлар кенгаши маълумотларига кўра, Осиё теннис федерациясининг янги логотипи ва мадҳияси тасдиқланди. Шунингдек, Осиёда ёшлар ўртасидаги турнирлар сони ортиб, ташкилотчи давлатлар бир-бирларига махсус таклифномалар жўнатишди. Шу билан бирга, Қозоғистон теннис федерацияси президенти, ITF вице-президенти Болат Ўтемуратовга осиёлик теннисчиларни жаҳон теннис тизимида рўйхатга олиш улуши ортиши муносабати билан Халқаро теннис федерациясидан ATFга қўшимча маблағ ажратишни қўллаб-қувватлаш бўйича сўров юборилди.
Эслатиб ўтамиз, аввалроқ қозоғистонлик теннисчилар Италия ва Хорватияда ярим финалга чиққани ҳақида хабар берган эдик.
