ҚР Президенти Жаҳон банки гуруҳи президенти билан учрашди
ASTANA. Kazinform – Қасим-Жомарт Тоқаев One Water саммити доирасида Жаҳон банки гуруҳи президенти Ажай Банга билан учрашди. Бу ҳақда Ақорда хабар берди.
Давлат раҳбари Қозоғистоннинг Жаҳон банки билан стратегик шериклиги муҳимлигини таъкидлади. Президент таъкидлаганидек, бугунги кунда сув хўжалиги, транспорт ва таълим соҳаларида умумий қиймати 3,5 миллиард доллар бўлган бешта йирик лойиҳа амалга оширилмоқда.
Давлат раҳбари Жаҳон банкининг “Транспорт йўллари барқарорлиги ва алоқадорлигини яхшилаш дастури” (TRACE) доирасида амалга ошириладиган Қозоғистон лойиҳасига 650 миллион доллар ажратиш ҳақидаги қарорини олқишлади. Шу билан бирга, Қасим-Жомарт Тоқаев Ўрта йўлакни ривожлантиришга, хусусан, Жезқазған – Қарағанди автомобиль йўли қурилишига йўналтирилаётган сармоянинг стратегик аҳамиятига эътибор қаратди.
Ажай Банга Жаҳон банки ва Қозоғистон ўртасидаги ҳамкорлик даражасини юқори баҳолади ва ўзаро манфаатли шерикликни мустаҳкамлашга тайёр эканини тасдиқлади. Хусусан, банк иқтисодиётнинг турли соҳаларида йирик қўшма лойиҳаларни амалга оширишдан манфаатдор.
Қасим-Жомарт Тоқаев икки томонлама мулоқотни жонлантириш ва ҳамкорликдаги узоқ муддатли истиқболни белгилаш мақсадида Ажай Бангани Қозоғистонга ташриф буюришни таклиф қилди.
Эслатиб ўтамиз, ҚР Президенти Қасим-Жомарт Тоқаев One Water саммитида иштирок этиш учун амалий ташриф билан Саудия Арабистонига борди.
