Қозоғистон Афғонистонга темир йўл қурилиши материаллари етказиб бериши мумкин

ASTANА. Кazinform — Қозоғистон Афғонистонга рельслар, шпаллар ва темир йўл қурилиши учун зарур бўлган бошқа материалларни етказиб беришни режалаштирмоқда. Бу ҳақда ҚР Транспорт вазири ўринбосари Мақсат Қалиакпаров маълум қилди.

— Ҳа, шундай лойиҳамиз бор. Маълумки, “Шимол-Жануб” халқаро транспорт йўлаги жуда истиқболли йўналиш бўлиб, Ҳирот ҳудудидаги илк участкалардан биридир. Бу борада рельслар ва шпаллар ишлаб чиқарувчи маҳаллий корхоналарни жалб этиш, яъни уларни етказиб беришни режалаштирганмиз, – деди Мақсат Қалиакпаров “Транспорт ва логистика бозори” VI халқаро конференцияси ва GLOBAL Avia DAY ҳаво юк ташувларини ривожлантириш бўйича I Халқаро форум доирасида ОАВ вакилларининг саволларига жавоб берар экан.

Вазир ўринбосарининг сўзларига кўра, бугунги кунда Афғонистонда темир йўл қурган Қозоғистон компанияси бор.

— У ерда ўз лойиҳасини амалга ошираётган мамлакатимизнинг Integra компанияси бор. Компания Афғонистон маблағлари ҳисобидан Афғонистон ва Эрон ўртасида темир йўл қурган. Ушбу лойиҳа амалга оширилди ва биз ушбу тажрибадан фойдаланишни давом эттиришни режалаштирмоқдамиз. Биринчи босқичда биз материалларни етказиб бериш бўйича музокаралар олиб борамиз. Бугунги кунда музокаралар олиб борилмоқда, бироқ амалда ҳозирча ҳеч қандай ҳужжат йўқ, — дея қўшимча қилди вазир ўринбосари.

Қозоғистон, Озарбайжон ва Грузия ўртасида ягона темир йўл маъмурияти ташкил этилгани ҳақида аввал хабар берган эдик.