Қозоғистон 4 давлатни боғловчи газ қувури лойиҳасида иштирок этмоқчи

ALMATY. Kazinform – Қозоғистон Туркманистон, Афғонистон, Покистон ва Ҳиндистонни боғловчи ТАПҲ газ қувури лойиҳасида иштирок этиш ниятида. Бу ҳақда ҚР Энергетика вазири ўринбосари Ерлан Ақкенженов бизнес-форумда маълум қилди.

Унинг сўзларига кўра, Туркманистон билан музокаралар олиб борилмоқда.

“Агар Қозоғистон компанияси ушбу лойиҳани муваффақиятли бошласа, бу мамлакатларимизнинг газ соҳасидаги ҳамкорлиги учун янги истиқболларни очади. Бундан ташқари, Қозоғистонда яшил иқтисодиётга ўтиш концепцияси қабул қилинган бўлиб, унга кўра, қайта тикланадиган энергия манбаларининг электр энергияси ишлаб чиқаришдаги улуши 2030 йилга бориб 15 фоизга, 2050 йилга келиб (муқобил энергия манбаларини ҳам ҳисобга олган ҳолда) 50 фоизга етади. Биз 2060 йилгача углерод нейтраллигига эришамиз”, – деди у.

Ҳозирда Қозоғистонда 139 та қайта тикланувчи энергия манбалари фаолият кўрсатмоқда.

“Вазирлик томонидан қайта тикланадиган энергия манбалари лойиҳаларини танлаш бўйича 5 йил муддатга аукцион ўтказиш жадвали ишлаб чиқилди. 2027 йилгача аукционга қўйилган қувватларнинг умумий ҳажми 6,7 ГВт дан ортиқ.

Биз афғонистонлик ҳамкасбларимиз билан қайта тикланадиган энергия манбалари бўйича аукционлар ўтказиш бўйича тажрибамизни баҳам кўришга тайёрмиз”, – деди Ерлан Ақкенженов.

Бунгача Қозоғистон ва Афғонистон ўртасидаги товар айирбошлаш ҳажми 330,7 миллион долларга етганини ёзган эдик.

Бундан ташқари, Қозоғистон Афғонистонга маҳаллий автомобилларни етказиб беришни режалаштирмоқда.