Қозоғистон 2050 йилгача атом энергиясини уч баравар ошириш декларациясига қўшилди

ASTANA. Kazinform — Бокуда БМТнинг иқлим ўзгариши бўйича COP29 конференцияси доирасида Қозоғистон Республикаси Энергетика вазири ўринбосари Сунғат Есимханов атом энергиясидан фойдаланишни уч баравар ошириш бўйича саъй-ҳаракатларни илгари суриш бўйича халқаро тадбирда иштирок этди. Бу ҳақда ҚР Энергетика вазирлиги матбуот хизмати хабар берди.

Вазир ўринбосари ўз нутқида Қозоғистон Париж келишуви мақсадларини амалга ошириш учун 2050 йилга келиб жаҳон иқтисодиётини карбонсизлантиришни жадаллаштириш ва иссиқхона газлари чиқиндиларини камайтиришга қаратилган атом энергетикасини уч баравар ошириш декларациясига қўшилишини маълум қилди.

“Қозоғистоннинг 2050 йилгача атом энергиясини уч баравар ошириш декларациясига қўшилиши - барқарор ва экологик тоза келажак сари муҳим қадамдир. Биз нафақат энергетика хавфсизлигини мустаҳкамлаймиз, балки умумий мақсадга эришиш йўлида жаҳон ҳамжамияти билан ҳамкорлик қиламиз, углерод чиқиндиларини глобал даражада камайтиришга салмоқли ҳисса қўшишга ҳаракат қиламиз”, — деди Энергетика вазири ўринбосари.

Париж келишувининг биринчи глобал таҳлили доирасида ядро энергетикаси ҳароратнинг 1,5 °C гача кўтарилишини чеклаш мақсадига эришишнинг асосий ечимларидан бири сифатида тан олинган.

Айни пайтда декларацияга 26 давлат қўшилган: Арманистон, Болгария, Канада, Хорватия, Чехия, Финляндия, Франция, Гана, Венгрия, Ямайка, Жанубий Корея, Молдова, Мўғулистон, Марокаш, Нидерландия, Польша, Руминия, Словакия, Словения, Швеция, Украина, БАА, Буюк Британия, АҚШ ва Қозоғистон.

Қозоғистоннинг атом энергетикасини уч баробар ошириш декларациясига қўшилиши мамлакат барқарор ривожланиш мақсадларига содиқлигини ва иқлим ўзгаришига қарши курашга катта ҳисса қўшишга тайёрлигини билдиради. Қозоғистон атом энергетикасини келажакдаги энергия балансининг муҳим таркибий қисмларидан бири деб билади, бу эса 2060 йилгача углерод нейтраллигига эришиш, тоза энергия манбалари улушини ошириш ва ишончли энергия таъминотини таъминлаш имконини беради.

Қозоғистон тинч атом энергетикасини ривожлантириш бўйича халқаро ташаббусларда фаол иштирок этиш ва бу борада етакчи давлатлар ва халқаро ташкилотлар билан ҳамкорликни кенгайтириш ниятида.

Эслатиб ўтамиз, аввалроқ Бокудаги саммитда Қозоғистон яшил энергияга қарийб 3,7 миллиард доллар сармоя киритганини ёзган эдик.