Бокудаги саммитда Қозоғистон “яшил” энергияга қарийб 3,7 млрд доллар сармоя киритди
ASTANA. Kazinform - Қозоғистон энергетика вазири Алмасадам Сатқалиев Бокуда (Озарбайжон) бўлиб ўтган БМТнинг Иқлим ўзгариши бўйича доиравий конвенциясининг 29-чи иқлим саммитида “яшил” энергетикани ривожлантириш соҳасида халқаро компаниялар ва ривожланиш институтлари билан ҳамкорлик қилиш бўйича қатор ҳужжатларни имзолади.
Хусусан, Энергетика вазири Қозоғистон Энергетика вазирлиги ва Осиё тараққиёт банки (ОТБ) ўртасида ўзаро англашув меморандумини имзолади.
Ҳужжат ОТБнинг энергияга ўтиш механизми орқали углерод нейтраллиги мақсадларига эришиш бўйича ҳамкорликни назарда тутади, унинг мақсади кўмир заводларини тугатишни тезлаштириш ва қайта тикланувчи энергия манбаларидан фойдаланишни кўпайтириш, энергия самарадорлигини ошириш ҳамда электр ва иссиқлик энергиясини ишлаб чиқаришда янги технологияларни жорий этишдир.
Имзоланган ҳужжатлар орасида Хитой Халқ Республикаси Ҳукумати билан қайта тикланувчи энергия манбалари соҳасида лойиҳаларни амалга ошириш тўғрисидаги битим ҳам бор, у Томонлар ўртасида қайта тикланадиган энергия манбалари соҳасидаги лойиҳаларни илгари суриш, ишлаб чиқиш ва амалга ошириш, Қозоғистон Республикаси ҳудудида барқарор ривожланиш, экологик тоза технологияларга ўтиш ва атмосферага чиқиндиларни камайтириш орқали глобал исишга қарши курашда ҳамкорликни назарда тутади. Ушбу лойиҳаларга йўналтирилган инвестициялар ҳажми 2 миллиард АҚШ долларидан ошиши тахмин қилинмоқда.
Шунингдек, Қозоғистон Республикасининг Жамбил вилоятида шамол электр станцияси лойиҳаси бўйича ABU DHABI FUTURE ENERGY COMPANY PJSC (MASDAR) билан инвестиция шартномаси имзоланди. Ушбу лойиҳа доирасида инвестицияларнинг кутилаётган ҳажми 1,5 миллиард АҚШ долларини ташкил этади.
Ушбу ҳужжат қайта тикланадиган энергия лойиҳаларини ишлаб чиқиш, “яшил ўтишни” амалга ошириш, углерод чиқиндиларини камайтириш ва иқлим ўзгаришига қарши курашиш бўйича БАА билан имзоланган ҳукуматлараро битимни амалга ошириш доирасида яратилган.
Бундан ташқари, конференция доирасида Қозоғистон энергетика вазири БМТ ЕИК, ACWA Power ва Masdar, ОТБ компаниялари вакиллари билан бир қатор учрашувлар ўтказди.
Эслатиб ўтамиз, аввалроқ Қозоғистон, Озарбайжон ва Ўзбекистон президентлари уч мамлакат энергетика тизимларини бирлаштириш тўғрисидаги битимни имзолагани ҳақида хабар берган эдик.
Маълумот учун: 11-22 ноябрь кунлари Боку шаҳрида БМТнинг Иқлим ўзгариши бўйича доиравий конвенцияси (СОР29) иштирокчилари конференциясининг 29-сессияси бўлиб ўтади. СОР29 доирасида 12-13 ноябрь кунлари энг юқори даражадаги тадбир - Иқлим бўйича жаҳон етакчиларининг саммити бўлиб ўтади.
