Фарғонадаги ёнғинда вафот этганлар сони 4 нафарга етди
TASHKENT. Kazinform – Бугун Фарғона вилоят ИИБ бу ҳақида расмий ахборот тарқатди. Унда қайд этилишича, жорий йилнинг 17 декабрь куни соат 13:45 ларда Фарғона шаҳар, Янгийўл маҳалласидаги “Petrolium” пропан газ қуйиш шохобчасида 5 м. куб сиғимли контейнерга газ қуйиш жараёнида ёриқ келиб чиқиб, газ моддаси ташқарига сизиб чиқиши оқибатида портлаш ва ёнғин содир бўлган, деб ёзади UzA.
Кеча 1 нафар фуқаро воқеа жойида ҳалок бўлган, шу ҳудудда бўлган бир нечта фуқаролар турли даражада тан жароҳати олиб, шифохонага ётқизилган. Вилоят ИИБ расмий ахборотида айтилишича, кўрсатилган тиббий ёрдамга қарамасдан улардан 3 нафари шифохонада вафот этган, дейилади хабарда.
Мазкур ҳолат юзасидан Фарғона вилояти ИИБ томонидан жиноят иши қўзғатилган. Ҳозирги кунда жиноят иши доирасида 5 нафар шахс процессуал тартибда қамоққа олинган ва тергов ҳаракатлари олиб борилмоқда.
