Елена Рибакина Дубай WTA 1000 турнирида 1/8 финалга чиқди

DUBAI. Kazinform – Қозоғистоннинг биринчи, дунёнинг 4-ракеткаси Елена Рибакина Дубай WТА 1000 турнирининг 1/8 финалига чиқди.

Мусобақани иккинчи даврадан бошлаган 24 ёшли қозоғистонлик теннисчи ўзидан 10 ёш катта, аввал жаҳон рейтингида пешқадам бўлган, ҳозирда 27-ўринни эгаллаб турган Беларусь вакили Виктория Азаренка билан куч синашди.

Бунгача рақиблар икки маротаба тўқнаш келишган ва иккаласида ҳам Е.Рибакина устунлик қилган.

Бу сафар биринчи партияда 2:2 ҳисоби қайд этилганида Азаренка брейк билан олдинга чиқиб олди - 4:2. Бу устунлик унга етарли бўлди - 6:4.

Иккинчи сетда эса Рибакина 4:2 ҳисобида олдинга чиқиб олди ва навбатдаги брейк билан якунлади - 6:2.

Шундан сўнг В.Азаренка тиббий ёрдам сўраб, жароҳати сабаб ўйинни давом эттиришдан бош тортди.

Бир соат 15 дақиқа давом этган баҳсда Е.Рибакина 4 та эйс амалга оширди ва 5 та брейк-пойнтдан 2 тасидан фойдаланишга муваффақ бўлди. В. Азаренко 1 та брейк билан чекланди.

Елена Рибакина чорак финалга чиқиш учун дунёнинг 53-ракеткаси польшалик Магдалена Фреш билан куч синашади. У иккинчи даврада 61-ўриндаги хорватиялик Петра Мартичдан устун келди - 6:4, 1:6, 6:2.

Бугун Дубайда кутилмаган натижа қайд этилди. Дунёнинг 2-ракеткаси, беларуслик Арина Соболенко рейтингнинг 31-поғонасида жойлашган хорватиялик Донна Векичга 7:6, 3:6, 0:6 ҳисобида имкониятни бой берди.