Давлат раҳбари Goertek саноат мажмуаси фаолияти билан танишди

ASTANА. Кazinform – Президент глобал технологик инновациялар корхонаси таркибига кирувчи Goertek саноат мажмуасини бориб кўрди, дея хабар беради Кazinform Ақорда матбуот хизматига таяниб.

Қасим-Жомарт Тоқаев мажмуага ташриф буюриб, ишлаб чиқариш жараёни, корхонада қўлланилаётган технологиялар билан танишди.

Компания акустика, оптика, микроэлектроника, нозик конструктив қисмлар, смарт ускуналар, виртуал ва кенгайтирилган реаллик технологияларидан фойдаланадиган қурилмалар, смарт наушниклар, смарт маиший техника ва бошқа юқори технологияли қурилмалар каби электрон ва аниқ дизайн компонентларини ишлаб чиқиш ва ишлаб чиқаришга ихтисослашган.

Ҳозирда Goertek компаниялар гуруҳида 100 мингдан ортиқ киши меҳнат қилмоқда. Компаниянинг ўртача йиллик даромади 2,8 миллиард долларга етади.

Эслатиб ўтамиз, Давлат раҳбари Қасим-Жомарт Тоқаев расмий ташриф билан Вьетнамда бўлиб турибди.

Президент Вьетнам раҳбари билан музокаралар ўтказди ва уни давлат ташрифи билан мамлакатга таклиф қилди.

Ушбу ташриф доирасида Қозоғистон ва Вьетнам ўртасида 12 та ҳужжат имзоланди.