Қасим-Жомарт Тоқаев Вьетнам Президенти Во Ван Тхионг билан музокара ўтказди

HANOY. Kazinform - Мулоқот чоғида савдо-иқтисодий, сармоявий, энергетика, транспорт-логистика, агросаноат ва маданий-гуманитар соҳалардаги ҳамкорликни ривожлантириш истиқболлари муҳокама қилинди, дея хабар беради Кazinform Ақорда матбуот хизматига таяниб.

Давлат раҳбари Во Ван Тхионгга меҳмондўстлик учун миннатдорлик билдириб, ташрифга катта аҳамият беришини таъкидлади.

– Қозоғистон Президенти сифатида гўзал мамлакатингизга биринчи ташрифим. Мен ушбу ташрифга алоҳида аҳамият бераман. Айтишим керакки, Қозоғистонда давлатингизга, халқингизга катта ҳурмат билан қарашади. Вьетнамнинг иқтисодий ютуқлари давлатларимиз ўртасидаги ҳамкорликни янада ривожлантириш учун жиддий асос бўлмоқда. Биз мамлакатларимиз ўртасидаги иқтисодий ва сиёсий ҳамкорликка катта эътибор қаратамиз ва Вьетнамнинг улкан иқтисодий салоҳиятини, халқаро майдондаги нуфузини муносиб баҳолаймиз, - деди Қасим-Жомарт Тўқаев.

Қозоғистон Президенти ўтган йили ўзаро товар айирбошлаш ҳажми ярим миллиард доллардан ошганини, 2023 йилнинг олти ойида эса 600 миллион долларга етганини айтди. Йил охиригача бу муҳим кўрсаткични 1 миллиард долларга етказиш режалаштирилган.

Давлат раҳбари бугунги музокаралар икки томонлама ҳамкорликни ривожлантиришда янги босқични очишига ишонч билдирди.

Во Ван Тхионг мамлакатлар ўртасидаги ҳамкорлик фаоллашганини юқори баҳолади ва Қозоғистон ва Вьетнам ўртасидаги яқин шерикликни мустаҳкамлаш ниятида эканлигини билдирди.

– Мамлакатимизга биринчи расмий ташрифингиз икки мамлакат ўртасидаги анъанавий дўстона муносабатлар ва муваффақиятли кўп қиррали ҳамкорликни фаоллаштиришга янги суръат бағишлашига ишонаман. Қозоғистонда бўлиб, улуғвор, гўзал мамлакат, меҳмондўст халқи мени ҳайратда қолдирди. Вьетнам Қозоғистон тараққиётини, Қозоғистон халқи Сизнинг раҳбарлигингизда эришган улкан муваффақиятларни диққат билан кузатиб бормоқда. Ишончим комилки, сизнинг тажрибангиз ва стратегик қарашингиз туфайли Қозоғистон хавфсиз ва барқарор ривожланиб, минтақа ва жаҳонда барқарорликни ривожлантириш ва сақлашга ҳисса қўшади.

Вьетнам ўтмишда миллий озодлик ва мамлакатни бирлаштириш учун курашда бизга кўрсатган қимматли қўллаб-қувватлаши ва ҳозирги вақтда мамлакатимиз тараққиётига кўрсатган ёрдами учун Қозоғистон халқини эслайди ва уларга миннатдорчилик билдиради. Вьетнам Қозоғистон билан анъанавий дўстона муносабатларга катта аҳамият беради ва мамлакатингизни Марказий Осиёдаги муҳим ҳамкор деб билади, - деди Вьетнам Президенти.

Музокара охирида Президент Қасим-Жомарт Тоқаев ҳамкасби Во Ван Тхионгни давлат ташрифи билан Қозоғистонга таклиф қилди.