АҚШ очиқ чемпионатида испаниялик теннисчи ғолиб чиқди
Испаниялик теннисчи жаҳон рейтингида тўртинчи ўринни эгаллаган бўлса, унинг финалдаги рақиби 23 ёшли норвегиялик Каспер Рууд 7-ўринни эгалаган.
Бу уларнинг «Катта Дубулға» турниридаги биринчи финали эди.
Жаҳон етакчиси, US Open чемпионатининг ўтган йилги ғолиби россиялик Даниил Медведев чорак финалда австралиялик Ник Кирьосга имкониятни бой берганидан сўнг, К.Алькарас ва К.Рууд ғолиби дунёнинг биринчи ракеткасига айланади.
Бунгача рақиблар икки марта учрашиб, испаниялик спортчи устун келган.
АҚШ очиқ чемпионатининг финал босқичида ҳам К.Алькарас ўйин тизгинини ўз қўлидан чиқармади – 6:4, 2:6, 7:6 (7:1), 6:3.
Уч соату 23 дақиқа давом этган учрашувда Алькарас 14 та эйс амалга оширди ва 11 та брейк-пойнтнинг учтасидан унумли фойдалана олди. Рууд 4 та эйс, 3 та брейк (10 та брейк-пойнт) билан ажралиб турди.
Шу тариқа Карлос Алькарас теннис тарихида жаҳон рейтингини бошқарган энг ёш спортчига айланди. У 2,6 миллион доллар ишлаб топди ва 2 минг рейтинг очкосини қўлга киритди.
Иккинчи ракетка - Каспер Рууд 1,3 миллион доллар ютиб, 1300 очко жамғарди.
Муаллиф: Ғайсағали Сейтақ
Фото: ELSA/Getty images via afp
