Жо Байден ўз ўғлини афв этди
ASTANA. Kazinform - АҚШ президенти Жо Байден икки жиноий иш бўйича айбдор деб топилган ва ҳукм чиқарилиши кутилаётган ўғли Хантерни афв этди, деб хабар беради Kazinform агентлиги Оқ уй баёнотига таяниб.
- Бу лавозимда ишлаган биринчи кунимданоқ мен Адлия вазирлиги қарорларига аралашмаслигимни айтдим ва ўғлимнинг танлаб ва адолатсиз жиноий жавобгарликка тортилишини кузатганимда ҳам, ўз сўзимда турдим, — деди Байден.
Сентябрь ойида Байденнинг ўзи ҳам, унинг матбуот котиби ҳам ўғлини афв этиш тўғрисида фармон чиқармоқчи эмаслигига ишонтирди.
Июнь ойида ҳакамлар ҳайъати 54 ёшли Хантер Байденни 2018 йилда қурол сотиб олаётганда гиёҳвандлик фактини яширганликда айбдор деб топди. Кичик Байден АҚШ тарихидаги амалдаги президентнинг жиноятда айбланган биринчи ўғлига айланди.
Кейин, сентябрь ойида Хантер Байденнинг ўзи яна бир ишда – солиқ тўлашдан бўйин товлаганликда айбини тан олди.
Якшанба куни кечқурун эълон қилинган баёнотда Жо Байден ўғлининг судлари "сиёсат билан булғанган" ва шунинг учун нотўғри қарорлар билан якунланганини таъкидлади.
- Бу ҳафта охирида мен бу қарорни қабул қилганимда, уни бошқа кечиктиришнинг маъноси йўқ эди. Умид қиламанки, америкаликлар ота ва президент нима учун бундай қарорга келганини тушунишади, — дейилади баёнотда.
Хантер Байденга 12 ва 16 декабрь кунлари ҳукм чиқарилиши керак эди. Иккинчи ҳолатда, 2016-2019 йилларда 1,4 миллион доллар солиқ тўлашдан бўйин товлагани учун у 15 йилгача қамоқ жазосига ҳукм қилиниши мумкин эди.
