Жежудаги фестиваль: Қозоғистон хори томошабинлар меҳрини қозонди
ASTANА. Кazinform – Астана шаҳридаги Еркеғали Раҳмадиев номидаги Давлат академик филармонияси камера хори Жанубий Кореянинг Жежу оролида IХ халқаро хор фестивалининг очилиш маросимида иштирок этиб, Қозоғистон санъатининг юксак савиясини намойиш этди.
Хор делегациясига “Қозоғистон-Осиё савдо ва маданиятни ривожлантириш ассоциацияси” президиуми раиси, Қозоғистон Республикаси санъат арбоби, профессор Дуйсен Қорабаевич Қасеинов бошчилик қилди.
Фестиваль давомида Қозоғистон хорининг чиқишлари зукко томошабинлар томонидан алоҳида эътироф этилди. Қозоқ миллий либосининг гўзаллиги, қўшиқларнинг оҳангдорлиги, нафис, дилга яқин оҳанглари томошабинларда катта таассурот қолдирди. Хусусан, дўмбира жўрлигида ижро этилган “Мен, мен эдим” (Махамбет Ўтемисули) ва “Ўн олти қиз” қўшиқлари томошабинларни ўзига ром этди. “Мен, мен эдим” қўшиғи иқтидорли хонанда ва гуруҳнинг мусиқий раҳбари Ерболат Абилай томонидан хорга мослаштирилган. Қўшиқнинг яккахон ижрочиси - Ақжол Сатжанули Сериков. Ақжолнинг ҳар бир нотада сезгирлиги, саҳнадаги ёрқин харизмаси томошабинларнинг олқишига сазовор бўлди.
Уч кунлик фестиваль дастури доирасида Филармония камера хори қозоқ қўшиқлари билан бир қаторда жаҳон классикаси ва замонавий асарларини ҳам ижро этди.
Хор репертуарига қуйидагилар киради:
"Тоғ ичида" (Сакен Сейфуллин, Беимбет Демеуов) - яккахон ижрочи Сания Ниғметова;
· “Ўн олти қиз” (қозоқ халқ қўшиғи, Салтанат Бекмағамбетова) – яккахон ижрочи Ақжол Сериков;
· “Айналайин” (Алиби Абдинуров);
· "Қалдирғоч" (Ахмет Жубанов, Ибадолла Матақов, Анатолий Молодов);
· "Мен, мен эдим" (Махамбет Ўтемисул) - яккахон ижрочи Ақжол Сериков;
· “Бир бола” (қозоқ халқ қўшиғи, Салтанат Бекмағамбетова) – яккахон ижрочи Индира Айтберген;
· «Las olas de la mar» (Мартина Камарго, Хуан Мануэль Эрнандес-Моралес) - яккахон ижрочи Индира Айтберген;
· “Жайдарман” (қозоқ халқ қўшиғи, Латиф Ҳамидий);
· "Қамажай" (қозоқ халқ қўшиғи, Борис Ляшко).
Фестиваль доирасида хор ҳар куни янги дастурни тақдим этиб, томошабинларга қозоқ маданиятининг серқирра кўринишларини янада чуқурроқ ҳис қилиш имконини берди. Айниқса, дўмбиранинг нозик садоси, солистларнинг жўшқин ижроси томошабинларда катта таассурот қолдирди.
32 нафар истеъдодли хонанда иштирок этаётган хорнинг бадиий раҳбари Қозоғистонда хизмат кўрсатган ходим Гулмира Қуттибадамова, бош хормейстери Данара Ташатова.
Жанубий Кореянинг Жежу оролида ўтказилган IХ Халқаро хор фестивали бутун дунёдан энг яхши хор жамоаларини бирлаштирган ноёб мусиқий тадбирдир. Фестивалдан кўзланган асосий мақсад ҳар бир давлатнинг маданияти ва миллий мусиқа анъаналарини намойиш этиш, хор санъатининг сеҳрли оламида ўзаро тажриба алмашишдан иборат.
Эслатиб ўтамиз, аввалроқ Қозоғистонда Осиё савдо ва маданиятни ривожлантириш ассоциацияси ташкил этилгани ҳақида хабар берган эдик.
