Жаҳон ободонлаштириш лойиҳалари: Қозоғистон қайси давлатларга эътибор бериши керак
ASTANA. Kazinform - Қозоғистон Президенти Қасим-Жомарт Тоқаев мамлакатни кўкаламзорлаштириш ва ўрмон майдонларини кенгайтириш бўйича кенг кўламли саъй-ҳаракатлар давом этишини маълум қилди. Бошқа давлатлар ҳам шу каби лойиҳаларни фаол ривожлантирмоқда, деб хабар беради Кazinform мухбири.
Хитой кўкаламзорлаштириш миллий устувор вазифага айланган мамлакатнинг ёрқин намунасидир. Хитой ўрмонларни қайта тиклаш бўйича етакчи бўлишдан ташқари, дарахт ва ўсимликлар экиш орқали қуруқ ерларни қайта тиклашда фаол иштирок этмоқда. Бу мамлакатнинг шимолий ҳудудларида чўлланишга қарши курашиш мақсадида 46 йил аввал бошланган “Хитойнинг яшил девори” дастурининг бир қисмидир.
Бу борада хитойлик мутахассислар салмоқли натижаларга эришиб, мамлакат тажрибасидан ҳозир бутун дунёда фойдаланилмоқда. 2012 йилдан бери Хитой чўл эрлари майдонини деярли ярмига қисқартира олди.
Бундан ташқари, Хитой ўрмонларни кесишни тақиқлади ва бошқа турдаги ердан фойдаланиш учун уларни қайта рўйхатдан ўтказишни тўхтатди. Хитой Қозоғистонга дарахт экиш, жумладан, қуриб қолган Орол тубини кўкаламзорлаштириш лойиҳаларида ҳам ёрдам бермоқда. Мутахассисларнинг фикрича, бу чўлланиш билан энг самарали курашишга ёрдам беради, чунки у туз ва қум билан қопланган тупроқ майдонини камайтиради.
Нидерландия "яшил томлар" концепциясини фаол ривожлантириб, ободонлаштиришга бошқача ёндашувни таклиф қилади. Мамлакатда биноларнинг томларида зич ўсимликлар билан боғлар яратиш кенг қўлланилади. Бу нафақат шаҳарларда ҳароратнинг кўтарилиши билан курашишга ёрдам беради, балки ҳаво сифатини яхшилаш ва карбонат ангидрид миқдорини камайтириш орқали атроф-муҳитни яхшилайди.
Бундай амалиётни Германия ва Швейцария каби бошқа Европа мамлакатларида ҳам кўриш мумкин, уларда уйда боғларини яратиш аллақачон шаҳар ландшафтининг ажралмас қисмига айланган. Буюк Британиянинг баъзи шаҳарлари, жумладан Лондон ва Шеффилд ҳам яшил томларни рағбатлантириш учун қонунлар киритди.
Нидерландиянинг Утрехт шаҳридаги яшил автобус бекатлари ҳам яхши мисол бўлиб, у ерда 300 дан ортиқ автобус бекатларининг томларида яшил майдонлар мавжуд.
Муаллиф: Жуман Кийиков
