Ўзбекистонда конституциявий референдум бошланди

TASHKENT. Kazinform – Ўзбекистонда республиканинг янги конституцияси бўйича референдум бошланди. Овоз бериш эрталаб соат 8:00 дан 20:00 гача давом этади, деб хабар беради Kazinform мухбири.

МСК маълумотларига кўра, референдумда 19,7 миллиондан ортиқ киши иштирок этиши мумкин. Бунинг учун 14 та ҳудудий сайлов комиссиялари тузилиб, 10 758 та сайлов участкаси ташкил этилди. Овоз бериш куни ўз манзилида бўла олмаган фуқаролар 19 апрелдан 26 апрелга қадар муддатидан олдин овоз бериш имкониятига эга.

Хориждаги Ўзбекистон фуқаролари 39 давлатда янги конституция учун овоз бериши мумкин. У ерда элчихоналар ва дипломатик миссиялар ёнида 55 та стационар жой ташкил этилган.

Ўзбекистоннинг амалдаги Конституцияси 1992 йилда қабул қилинган бўлиб, шу даврда мамлакатнинг асосий қонунига 15 марта ўзгартиришлар киритилган. Янги таҳрирда конституциянинг моддалари сони 128 тадан 155 тага, нормалари 275 тадан 434 тага кўпайди. Натижада, асосий қонун матни 65 фоизга янгиланади, шунинг учун унга ўзгартириш киритиш эмас, балки республиканинг янги конституцияси тўғрисидаги қонунни қабул қилиш бўйича референдум ўтказиш тавсия этилди.

Қонунчиликка кўра, референдумда сайловчилар рўйхатидагиларнинг ярмидан кўпи иштирок этиши керак. Агар овоз беришда қатнашган фуқароларнинг ярмидан кўпи уни қўллаб-қувватласа, референдум қабул қилинган ҳисобланади. Марказий сайлов комиссияси референдумнинг дастлабки натижаларини 1 май куни эълон қилади. Референдумнинг расмий натижаси Ўзбекистон Марказий сайлов комиссияси томонидан овоз беришдан кейин 10 кундан кечиктирмай эълон қилинади.

Аввалроқ, 2022 йил май ойида Ўзбекистон сиёсий партиялари мамлакат Конституциясини такомиллаштириш жараёнини бошлагани хабар қилинганди. Умумхалқ муҳокамасидан сўнг жорий йилнинг март ойида Ўзбекистон парламенти референдум 30 апрель куни ўтказилишини тасдиқлади.

Муаллиф: Балнур Қожагелди