Ўзбекистонда катталарнинг 75 фоизи коронавирусга қарши тўлиқ эмланди

TASHKENT. Kazinform – Ўзбекистонда катта ёшли аҳолининг 75 фоизи COVID-19га қарши эмлашнинг тўлиқ курсидан ўтди, дея хабар бермоқда Kazinform мухбири.

Ўзбекистон Республикаси Соғлиқни сақлаш вазирлиги маълумотларига кўра, эмлаш учун режалаштирилган 18 ёшдан ошган 21,4 миллион аҳолидан деярли 20 миллион нафари ёки аҳолининг 93,1 фоизи вакцинанинг биринчи дозасини олган. Тўлиқ эмланганлар улуши эса 75,3 фоизни ташкил қилади.

Бугунги кунга қадар мамлакатда 49,4 миллион доза вакцина қўлланилган, 19 миллион 977 минг 757 киши биринчи, 16 миллион 053 минг 415 киши иккинчи, 13 миллион 372 минг 805 нафар ўзбекистонлик учинчи доза (ZF-UZ-VAC2001 хитой-ўзбек вакцинаси уч дозада қўлланилади) билан эмланган.

Эслатиб ўтамиз, Ўзбекистонда эмлаш кампанияси ўтган йилнинг 1 апрелидан бошланган эди. Эмлаш олтита препарат билан амалга оширилади: AstraZeneca, ZF-UZ-VAC2001, «Спутник-V», Moderna, Pfizer ва Sinovac. 2021 йил 3 августда республикада меҳнатга лаёқатли аҳолини мажбурий эмлашнинг ҳуқуқий асосларини белгиловчи қонун қабул қилинди.

Муаллиф: Мадибек Жанибеков