Ўзбек-Хитой вакцинаси Ўзбекистонда ишлаб чиқарилиши мумкин

TASHKENT. UzA - Kazinform - Хитойнинг «Anhui Zhifei Logcom Biopharmaceutical» компанияси ва ўзбекистонлик олимлар ҳамкорликда ишлаб чиқарган ZF-UZ-VAC2001 вакцинасини Ўзбекистонда ишлаб чиқариш режалаштирилган. Бу ҳақда Kazinform UzAга асосланиб хабар бермоқда.

Хитойнинг«Anhui Zhifei Logcom Biopharmaceutical» компанияси делегацияси 23 июл куни Ўзбекистон Инновацион ривожланиш вазирлиги ва Фармацевтика саноатини ривожлантириш агентлигининг таклифига биноан Тошкентга келди.

Вазирлик маълумотларига кўра, делегация Ўзбекистонга ўзбек-хитой вакциналарини ишлаб чиқаришни йўлга қўйиш бўйича музокаралар ўтказиш учун келган. Мутахассислар вакцина ишлаб чиқаришнинг инфратузилмавий имкониятларини баҳолайдилар.

Хитой Фанлар академияси SARS-CoV-2 коронавирусга вакцина ишлаб чиқариш лойиҳасининг ташаббускори ва мувофиқлаштирувчисидир.

Инновацион ривожланиш вазирлиги ҳузуридаги илғор технологиялар маркази ва Соғлиқни сақлаш вазирлигининг вирусология илмий-тадқиқот институти вакцинани синовларида бевосита иштирок этганликлари ва клиник тадқиқотларга қўшган ҳиссалари туфайли Ўзбекистон вакцинанинг ҳаммуаллифи сифатида тан олинган.

Эслатиб ўтамиз, ZF-UZ-VAC2001 вакцинасининг захираси Ўзбекистонда 8,5 миллион дозага етди. Фуқаролар вакцинанинг уч дозасини олганда, бутунлай эмланган ҳисобланади.