Йил бошидан буён Қозоғистон Ўзбекистонга 473 млн долларлик маҳсулот экспорт қилди

TASHKENT. Kazinform – Январь-февраль ойлари якунларига кўра Қозоғистон Ўзбекистоннинг асосий савдо ҳамкорлари учлигидан жой олди, деб хабар беради Kazinform агентлиги мухбири.

Ўзбекистон Миллий статистика қўмитаси маълумотларига кўра, январь-февраль ойларида мамлакат ташқи савдо айланмаси ўтган йилнинг шу даврига нисбатан 9,9 фоизга ўсиб, 10,8 миллиард долларга етди. Бугунги кунда қўшни давлат дунёнинг 162 давлати билан савдо қилади.

Мамлакатнинг асосий савдо шериги Хитой ҳисобланади. Икки давлат ўртасидаги товар айирбошлаш ҳажми 2 миллиард доллардан ошди (умумий кўрсаткичнинг 19,2 фоизи).

Кейинги ўрин савдонинг 14,9 фоизи билан Россияга тўғри келади. Бу мамлакат билан ўзаро савдо айланмаси ҳажми 1,6 миллиард доллардан ошади.

Бундан ташқари, Қозоғистон кучли учликни якунлаб турибди. Мамлакатимиз билан Ўзбекистон ўртасидаги товар айирбошлаш ҳажми 659,9 миллион долларни (6,5 фоиз) ташкил этди. Бу ўтган йилнинг шу даврига нисбатан 78,8 миллион долларга кўпдир.

Кўриб чиқилаётган даврда Ўзбекистон Қозоғистонга 186,1 миллион долларлик маҳсулот экспорт қилди ва 473,8 миллион доллардан ортиқ импорт товарларни келтирди.

Эслатиб ўтамиз, расмий Астана ва Тошкент ўзаро товар айирбошлаш ҳажмини 10 миллиард долларга етказишдан манфаатдор. Ушбу кўрсаткичга эришиш учун Қозоғистон ва Ўзбекистон ўртасида 4 та қўшимча савдо йўлаклари очилиши мумкин.

Бундан ташқари, сўнгги 5 ойда Қозоғистон Ўзбекистонга 2 миллион тонна ғалла экспорт қилган.

Муаллиф: Алихан Асқар