Япониядаги ўрмон ёнғинлари: 80 дан ортиқ уй ёниб кетди

ASTANA. Kazinform - Иватэ префектурасининг Офунато шаҳрида содир бўлган ўрмон ёнғинлари натижасида 80 дан ортиқ уй ёниб кетди, 2 мингга яқин кишини эвакуация қилиш бўйича буйруқ берилди, деб хабар беради Kazinform агентлиги Kyodo Newsга таяниб.

Бу тахминан бир ҳафта ичида минтақадаги учинчи ёнғиндир. Чоршанба куни содир бўлган ёнғин 600 гектар майдонни ёқиб юборди, деди маҳаллий ҳокимият. Ёнғинни ўчириш тун бўйи давом этди. Пайшанба куни эрталаб ёнғинни ҳаводан ўчириш учун ўзини-ўзи мудофаа кучлари вертолётлари сафарбар этилган.

Воқеа жойида куйган жасад ҳам топилган ва полиция унинг ёнғинга алоқадорлигини текширмоқда.

Бош вазир идорасида мувофиқлаштирувчи штаб тузилди. Вазирлар кабинети бош котиби Ёсимаса Хаяси марказий ҳукумат "зарурий ёрдам кўрсатиш учун маҳаллий ҳокимиятлар билан яқиндан ҳамкорлик қилишини" айтди.

Пайшанба куни Офунато шаҳрида мактаб ва болалар боғчалари ёпилган, маҳаллий ҳокимият маълумотларига кўра, 500 та уй электр таъминотисиз қолган. Шаҳардаги темир йўл линиясининг бир қисмида ҳам ҳаракат тўхтатилди.

Маҳаллий ҳокимиятнинг маълум қилишича, чоршанба куни кучли шамол вертолётлардан фойдаланишга тўсқинлик қилгани сабабли ёнғинни ўчириш ҳаракатлари ердан амалга оширилган.

Аввалроқ, 19 февраль куни Офунатода ўрмон ёнғини содир бўлиб, сешанба куни эрталаб у асосан ўчирилган эди.

Иккинчи ёнғин сешанба куни яқин атрофдаги Рикудзентаката шаҳрида содир бўлган ва чоршанба куни ўчирилган.

Сўнгги ёнғин биринчи ёнғин содир бўлган жой яқинида бошланган бўлса-да, расмийлар иккаласининг бир бири билан боғлиқлиги ҳали аниқ эмаслигини айтишди.

Эслатиб ўтамиз, аввалроқ Лос-Анжелесдаги ўрмон ёнғинида ҳалок бўлганлар сони 16 кишига етгани ҳақида хабар берган эдик.