Япония Марказий Осиёга иқтисодий ёрдам пакетини эълон қилади
TOKYO. Kazinform – Япония бош вазири Фумио Кишида август ойида Қозоғистонда Марказий Осиёнинг бешта давлати раҳбарлари билан учрашув ўтказади ва минтақага иқтисодий ёрдам пакетини эълон қилади. Бу ҳақда Япония ҳукумати вакилларига таяниб, The Japan Times хабар берди.
“Кишиданинг Ўзбекистон, Қозоғистон ва Мўғулистонга ташрифи 9-12 август кунларига мўлжалланган. Иқтисодий пакет савдо йўлларини яратиш, карбонсизлантириш ва одамлар ўртасидаги алмашинувни ривожлантиришга қаратилган. Бу Қозоғистондаги олти томонлама саммитдан сўнг эълон қилинадиган қўшма баёнотнинг бир қисми бўлиши кутилмоқда”, – дейилади хабарда.
Ёрдам режасига кўра, Япония Каспий денгизи орқали Марказий Осиё ва Европани Россиясиз боғлайдиган савдо йўлини қуришга ёрдам беради. Шу боис Япония барқарор экспорт йўли минтақага иқтисодий мустақиллик беради, деб умид қилмоқда.
“Декарбонизация соҳасида Япония компанияларининг технологиялари ва кредитлари табиий газни қайта ишлашга ёрдам бериш каби чора-тадбирлар учун ишлатилиши кутилмоқда. Япония минтақадан малакали ишчиларни қабул қилишни режалаштирмоқда”, – дейилади хабарда.
Қайд этилишича, Токио Хитой ва Россия каби кучли таъсирга эга бўлган давлатлар билан алоқалари мустаҳкам бўлган минтақага барқарор иқтисодий ривожланишда ёрдам беришни мақсад қилган.
“Марказий Осиё Шарқий Осиё ва Европа ўртасидаги асосий геосиёсий минтақа бўлиб, газ каби табиий ресурсларга бой. Сўнгги йилларда Хитой у ерда ўзининг иқтисодий таъсирини кенгайтирмоқда, АҚШ ва Европа Иттифоқи эса алоқаларни мустаҳкамлашга интилмоқда”, – деб ёзади The Japan Times.
Эслатиб ўтамиз, аввалроқ Япония бош вазири Фумио Кишида Қозоғистонга ташриф буюриши ҳақида хабар берган эдик.
