Янги бюджет кодекси: Миллий жамғарма маблағлари фақат икки йўналишда сарфланади

ASTANА. Кazinform – Қозоғистон Республикаси Мажилиси депутатлари Бюджет кодексини иккинчи ўқишда қабул қилди.

Депутатлар янги кодексга овоз берганидан сўнг, палата раиси Ерлан Қошанов ҳужжатнинг асосий нормаларига тўхталди.

— Бугун биз жуда муҳим қонун қабул қилдик. Бу мамлакат молия тизимини ислоҳ қилиш йўлидаги катта, муҳим қадамдир. Бугун биз муҳим қадамни ташладик. Маълумки, ўтган йили Президент янги иқтисодий моделга ўтиш бўйича олдимизга улкан вазифаларни қўйган эди. Бунинг ҳуқуқий асосларини шакллантирмоқдамиз. Ҳозирда Солиқ кодекси Мажилисда кўриб чиқилмоқда. Бугун эса биз янги Бюджет кодексини қабул қиляпмиз.

Ўтган ҳафтада мамлакат бюджети кўриб чиқилаётганида бюджет сиёсати ҳақида қизғин баҳс-мунозаралар бўлиб ўтди. Депутатлар томонидан билдирилган барча танқидлар бугунги кодексда инобатга олинди, - деди у.

Унга кўра, депутатлар Ҳукуматдан тақдим этилган Кодекс лойиҳасига айрим концептуал ўзгартиришлар киритдилар.

– Хусусан, Миллий жамғарма маблағларидан самарасиз фойдаланиш масаласи тез-тез кўтарилди. Янги Бюджет кодексида ушбу маблағларни аниқ мақсадларга сарфлаш нормаси тасдиқланди. Эндиликда Миллий жамғарма маблағлари фақат ишлаб чиқариш ёки аҳоли пунктларининг ҳаётий инфратузилмасига сарфланади.

Бундан ташқари, квазидавлат секторида дивиденд сиёсати қайта кўриб чиқилди. Бу кўп йиллар давомида айтилаётган гап. Биз буни бугунги Бюджет кодексида қонунийлаштирдик. “Самруқ-Қазна” жамғармаси даромадларининг камида 50 фоизи, квазидавлат компаниялари даромадларининг 70 фоизи бюджетга ўтказилади. Бу аввал Ҳукумат қарори билан тасдиқланган бўлса, энди Кодексга киритмоқдамиз, - деди Мажилис раиси.

Ерлан Қошанов янгиланган бюджет жараёнида 10 йиллик узоқ муддатли прогноз ишлаб чиқилишини таъкидлади.

– Бундай ёндашув қисқа ва узоқ муддатли истиқболда бюджет харажатларини тўғри режалаштириш, бюджетдан самарали фойдаланиш имконини беради. Бундан ташқари, биз ҳудудларнинг мустақиллигини оширишда давом этамиз. Кодексда бюджет даромадларининг бир қисмини республика даражасидан маҳаллий давлат ҳокимияти органлари даражасига ўтказиш назарда тутилган. Буларнинг барчаси келгусида маҳаллий ресурсларнинг самарали ўзлаштирилишига ижобий таъсир кўрсатиши шубҳасиз, - деди маърузачи.