X Боку халқаро китоб ярмаркаси Кемел Тоқаев китобининг тақдимоти билан очилди
BAKU. Кazinform - Бокуда таниқли қозоқ ёзувчиси ва жамоат арбоби Кемел Тоқаевнинг озарбайжон тилида нашр этилган “Махсус топшириқ” китобининг тақдимоти бўлиб ўтди, деб хабар беради Kazinform агентлиги мухбири.
Китоб Турк маданияти ва мероси жамғармаси ташкилотчилигида нашр этилган. Тақдимот Х Боку халқаро китоб ярмаркаси доирасида бўлиб ўтди.
Тадбирда Қозоғистон Республикаси Президенти Маслаҳатчиси Малик Отарбаев, Қозоғистоннинг Озарбайжондаги Элчиси Алим Байел, Турк маданияти ва мероси жамғармаси президенти Ақтоти Райимқулова, Парламент депутатлари, Озарбайжон давлат тузилмалари вакиллари, зиёлилар ва бошқалар иштирок этди.
Ақтоти Райимқулованинг таъкидлашича, туркий дунёнинг атоқли намояндалари ижодини тарғиб қилиш Турк маданияти ва мероси жамғармаси фаолиятининг асосий йўналишларидан биридир. Шу мақсадда жамғарма томонидан “Турк дунёсининг намояндалари”, “Турк дунёси адабий дурдоналари”, “Турк дунёсининг илм жавҳарлари” каби туркум китоблар нашр этилмоқда.
“Атоқли қозоқ ёзувчиси ва жамоат арбоби Кемел Тоқаевнинг “Турк дунёси адабий дурдоналари” туркумига кирувчи “Махсус топшириқ” китоби жамғарманинг навбатдаги нашри бўлди. Кемел Тоқаев турк маданияти ва сўз санъати ривожига улкан ҳисса қўшган шахсдир. У ёзувчиликдан ташқари журналистика билан ҳам шуғулланиб, Қозоғистоннинг муҳим маданий-ижтимоий муаммоларини ёритган”, — деди Ақтоти Райимқулова.
Давлат раҳбари Маслаҳатчиси Малик Отарбаев йиғилганларни Қозоғистон Президенти Қасим-Жомарт Тоқаев номидан табриклаб, Кемел Тоқаев қозоқ адабиётида детектив жанрга асос солган ёзувчи эканлигини таъкидлади.
“Унинг ҳар бир асари архив маълумотлари асосида ёзилган. У ўз даврининг руҳини кўрсатди ва тарихда унутилмас из қолдирди”, — деди маслаҳатчи.
Малик Отарбаевнинг сўзларига кўра, асарнинг озарбайжон тилига таржима қилингани ва китоб ярмаркасида намойиш этилгани бокуликлар учун алоҳида аҳамиятга эга. Ёзувчи қаламига мансуб ҳар бир асар келажак авлодлар учун меросдир.
Озарбайжон халқ ёзувчиси Анор Рзаевнинг айтишича, Қозоғистонга бўлган муҳаббат уни Абайнинг бетакрор шахси ҳақида мақола ёзишига туртки бўлган. Қардош қозоқ халқига алоҳида қизиқиши борлигини қайд этиб, ёзувчи Кемел Тоқаев ижодига ҳам катта ҳурмат-эҳтиром билдирди.
Озарбайжоннинг таниқли адиби Чингиз Абдуллаев асар Озарбайжон ва Қозоғистон халқлари ўртасидаги маданий-адабий алоқаларни янада мустаҳкамлашга хизмат қилишини, китобхонда катта қизиқиш уйғотишини таъкидлади. Ч.Абдуллаев, айниқса, Кемел Тоқаевнинг детектив жанрда ижод қилган ёзувчи сифатидаги мураккаб ва қизиқарли тақдири уни ҳайратда қолдирганини таъкидлади.
Озарбайжон Миллий фанлар академияси президенти, академик Исо Габиббейли Кемел Тоқаев китобининг озарбайжон тилида нашр этилиши китобхонларга қозоқ адабиёти арбоби ижоди билан янада яқиндан танишиш имконини беришини таъкидлади.
Озарбайжондаги Отатурк маркази директори, академик Низомий Жафаров ҳам китоб ҳақида ўз фикрлари билан ўртоқлашди. У асарда совет давридаги фашизмга қарши кураш тарихи кенг ёритилганига эътибор қаратади.
Миллий Мажлиснинг Жамоат бирлашмалари ва диний ташкилотлар қўмитаси раиси Фозил Мустафо Кемел Тоқаев фаолияти ҳақида гапирар экан, бундай тадбирларни анъанага айлантириш муҳимлигини таъкидлади.
Муаллиф: Серикбол Қошмағанбетов
