Вашингтонда Исроил элчихонасининг икки ходими отиб ўлдирилди

ASTANA. Kazinform – 21 май, чоршанба куни кечқурун Вашингтондаги Capital Jewish Museum (Капитал яҳудий музейи) олдида Исроил элчихонасининг икки ходими отиб ўлдирилди, деб хабар беради DW.

Полиция маълумотларига кўра, гумонланувчи қўлга олинган. У Чикагодан келган 30 ёшли Элиас Родригес. У музей олдида бир муддат юрган, сўнгра ичкари кириб, тўрт нафар кишидан иборат гуруҳга яқинлашиб, уларнинг икки нафарини отиб ташлаган. Ҳужумчи хавфсизлик хизмати томонидан зудлик билан қўлга олинган. Уни ушлаш чоғида “Фаластинга эркинлик!” деб бақиргани қайд этилган.

Исроил элчихонаси вакили маълум қилишича, икки ходим музейдаги тадбирда иштирок этаётган пайтда яқин масофадан отиб ўлдирилган. Ҳалок бўлганлар – эркак ва аёл, ёш жуфтлик бўлган.

АҚШ президенти Дональд Трамп Truth Social платформасида марҳумлар оиласига ҳамдардлик билдириб, бу воқеани антисемитизм билан изоҳлади.

АҚШ ҳукумат идоралари ҳодисани тергов қилмоқда

АҚШнинг ички хавфсизлик вазири Кристи Ноэм икки Исроил элчихонаси ходимининг ҳалок бўлганини тасдиқлади.

“Биз воқеани фаол ўрганяпмиз ва қўшимча маълумот олишга уринаяпмиз”, – деб ёзди у X ижтимоий тармоғида.

Исроилнинг БМТдаги доимий вакили Дани Данон бу воқеани “антисемитик терроризмнинг жирканч акти” деб атади. Унинг сўзларига кўра, дипломатлар ва яҳудий жамоасига тажовуз қилиш – қизил чизиқни кесиб ўтиш демакдир.

Данон АҚШ ҳукуматининг айбдорларни қаттиқ жазолашига ишонч билдирди ва Исроил ўз фуқаролари ҳамда дипломатик вакилларини бутун дунё бўйлаб ҳимоя қилишда давом этишини таъкидлади.

Бунгача Финландияда мактабда отишма юз бериб, уч нафар ўсмир жароҳатлангани ҳақида ёзган эдик.