Ўзбекистонлик Муҳаммадали Ўринбоев «Антверпен» сафига ўтди

TASHKENT. Kazinform — Тошкентнинг «Пахтакор» клуби футболчиси Муҳаммадали Ўринбоев фаолиятини «Антверпен»да давом эттиради. Бу ҳақда клуб матбуот хизмати хабар берди.

20 ёшли вингер Бельгия клуби билан 2029 йилнинг 30 июнига қадар мўлжалланган шартнома имзолади.

Манбаларга кўра, трансфер учун Тошкент клуби ҳисобига 750 минг евро тўлаб берилган.

Маълумот учун, Муҳаммадали Ўринбоев таниқли футболчи Забиҳулло Ўринбоевнинг укаси ҳисобланади.

У муқаддам Англиянинг «Брентфорд» клуби ёшлар жамоасида ҳам ўйнаб келганди.

Ўринбоев «Пахтакор» билан биргаликда уч марта мамлакат чемпионлигини қўлга киритган. Шунингдек, у Ўзбекистон ёшлар жамоаси аъзоси сифатида сўнгги U-20 Осиё кубогида 4 та гол билан тўпурар бўлганди.

У Ўзбекистон чемпионатининг жорий мавсумида «Пахтакор» сафида жами 14 та ўйинда майдонга тушиб, 5 та гол урди ва 3 та голли узатмани амалга оширди.

«Антверпен» Бельгиянинг 5 карра чемпиони ҳисобланади. Жамоа ўтган мавсумда бешинчи ўрин билан кифояланган.

Эслатиб ўтамиз, аввалроқ ўзбекистонлик 3 футболчи Англия клубида кўрикдан ўтиш учун Лондонга жўнаб кетгани ҳақида хабар берган эдик.