Ўзбекистонлик Илья Сибирцев Канадада учта олтин медални қўлга киритди

TASHKENT. Kazinform — Канадада сузиш бўйича ўтказилган “The 60th Annual Mel Zajac Jr. International Swim Meet” халқаро турнирида сузиш бўйича Ўзбекистон терма жамоаси аъзоси Илья Сибирцев муваффақиятли иштирок этди, деб хабар беради UzA.

У эркин усулда 400, 800 ва 1500 метр масофада ўтган беллашувларда барча рақибларини орта қолдирди ва учта олтин медалга эга чиқди. 400 метр масофадаги баҳсларда 3:48.26 натижа қайд этган Илья ғолиб бўлиш билан бир қаторда, Ўзбекистоннинг янги рекордини ҳам ўрнатди.

Агентликнинг эслатишича, Илья Сибирцев шу йилнинг апрель ойида Калифорния штатида ўтган “TYR Pro Swim Series” халқаро сузиш мусобақасида 1500, 400 ва 800 метр масофада эркин усулда сузиш баҳсларида кумуш медални қўлга киритган.

Эслатиб ўтамиз, аввалроқ ўзбекистонлик боксчи Бектемир Мелиқўзиевнинг жанги тасдиқлангани ҳақида хабар берган эдик.