Ўзбекистонлик Бектемир Мелиқўзиев ғалабага эришди ва WBA камари учун даъвогарга айланди
TASHKENT. Kazinform — АҚШнинг Лас-Вегас шаҳрида профессионал бокс оқшоми бўлиб ўтди, деб хабар беради Kazinform агентлиги Olamsport.comга таяниб.
Мазкур жанг оқшомининг марказий тўқнашувида ўзбекистонлик Бектемир Мелиқўзиев WBA Eliminator камари учун америкалик Дарьюс Фулгхэмга қарши рингга кўтарилди.
12 раундлик жанг тўлиқ давом этди ва унда Бектемир ҳакамларнинг бир овоздан берган 114-112 ҳисобидаги очколари эвазига ғалаба қозонди.
Қайд этиш лозимки, 7-раундда Бектемирдан очко олиб ташланди. 12-раундда эса Б. Мелиқўзиев рақибини нокдаун ҳолатига ҳам туширганди.
Шу тариқа, энди у Сауль Альвареснинг камари учун даъвогарга айланди.
Ушбу иккинчи ўрта вазн тоифасида WBA Super чемпионлик камари Сауль Альваресга тегишли. Калеб Плант эса вақтинчалик чемпион ҳисобланади. Шунингдек Увел Эрнандес WBA Gold камарига эгалик қилади.
Эслатиб ўтамиз, аввалроқ ўзбекистонлик боксчи Бектемир Мелиқўзиевнинг жанги тасдиқлангани ҳақида хабар берган эдик.
