Ўзбекистонлик Абдуллаев ва Турғунбоев навбатдаги жанглари учун Венгрияга йўл олди

TASHKENT. Kazinform - 26 апрель куни Венгрия пойтахти Будапешт шаҳридаги "Folyondar Sports Hall" мажмуасида профессионал бокс оқшоми бўлиб ўтади, деб хабар беради Kazinform агентлиги Ўзбекистон профессионал бокс федерациясига таяниб.

Турнир доирасида ўзбекистонлик икки чарм қўлқоп устаси — Шоҳжаҳон Абдуллаев ҳамда Комронбек Турғунбоев ҳам рингга кўтарилади. Боксчилар мураббий Даврон Ғофуров ва Руслан Телимбаев ҳамроҳлигида турнир манзили томон йўлга чиқишган.

Маълумот учун, 22 ёшли Абдуллевга 26 апрель кунги жангида Венесуэла вакили Иван Матьют рақиблик қилса, 21 яшар Турғунбоев молдовалик Иван Петровга қарши рингга кўтарилади.

Бу Шоҳжаҳон Абдуллаев учун профессионал боксдаги тўртинчи жанг бўлади. У бундан аввалги жангларининг барчасида рақибларидан устун келганди. Абдуллаевнинг бўлажак рақиби — 31 яшар Матьют ҳисобида эса 31 ғалаба, 20 та мағлубият ва 2 дуранг бор.

Ярим ўрта вазнли Комронбек эса 2023 йилда профессионал боксда дебют қилиб, Богдан Утегеновни мағлуб этганди. Петров (7-16-2)га қарши жанг ўзбекистонлик боксчи учун профессионал фаолиятидаги иккинчиси бўлади.

Эслатиб ўтамиз, аввалроқ WBA Шаҳрам Ғиёсов - Жарон Эннис жангига буйруқ бергани ҳақида ёзган эдик.