Ўзбекистондаги қозоқ мактабларида ўқитувчилар етишмайди - Ўзбекистоннинг собиқ депутати
Бугунги кунда Ўзбекистонда 370 га яқин мактабларда таълим қозоқ тилида олиб борилмоқда. Аммо мамлакатда бу мактабларда дарс берадиган ўқитувчилар етарли эмас. Бу муаммони Астанада бўлиб ўтаётган “Отандастар” форумида Ўзбекистон Экология вазирининг маслаҳатчиси, собиқ депутат Расул Кушербоев кўтарди, деб хабар беради Каzinform агентлиги мухбири.
– Айни пайтда Ўзбекистонда 370 га яқин таълим қозоқ тилида олиб бориладиган мактаблар мавжуд. Бу мактабларда математика, кимё, биология каби қатор фанлар бўйича ўқитувчилар етишмайди. Қолаверса, ушбу мактабларда қозоқ тилида ўқув адабиётлари деярли йўқ, бу тилни ўрганишни қийинлаштиради. Қолаверса, Қозоғистонда ўқиш истагида бўлган мактаб ўқувчилари кўп. Аммо улар учун Қозоғистон олий ўқув юртларига кириш учун зарур бўлган ягона миллий тест синовларидан ўтишлари жуда қийин. Шунинг учун хориждаги қозоқ ёшлари учун махсус имтиҳонлар, осон тестлар ёки суҳбатлар жорий этишни таклиф қиламиз, — деди Расул Кушербоев.
Қозоқ мактабларида ўқитувчилар етишмаслиги муаммосини ҳал қилиш учун собиқ депутат Ўзбекистон фуқароларини Қозоғистонга ўқишга юбориш керак, деб ҳисоблайди. Шу билан бирга, Қозоғистон дипломлари Ўзбекистонда тан олиниши керак. Аммо бу муаммо ҳозирча ҳал этилмаган, - дейди Кушербоев.
— Қозоғистон дипломларини Ўзбекистонда тан олиш масаласи очиқлигича қолмоқда ва ечимни талаб қилади. Бу йўналишда икки давлатнинг масъул идоралари ҳамкорликда иш олиб бориши керак. Бундан ташқари, дунёнинг 1000 та энг яхши таълим муассасалари рейтингига киритилган Қозоғистон университетларининг Ўзбекистонда филиалларини очишни мақсадга мувофиқ деб биламиз, — деди собиқ депутат.
Эслатиб ўтамиз, Расул Кушербоев 8 йил давомида Ўзбекистон парламенти қуйи палатаси депутати бўлган.
Муаллиф: Данира Искакова
