Ўзбекистонда “OTP Group Tashkent Grand Slam” турнири бўлиб ўтади

TASHKENT. Kazinform - Яна икки кундан сўнг Тошкентда дунёнинг энг кучли дзюдочилари иштирокидаги “Катта Дубулға" турнири бошланади, деб хабар беради Kazinform агентлиги UzAга таяниб.

Маълум қилинишича, Халқаро дзюдо федерацияси тақвимидан жой олган энг нуфузли мусобақада 23 та давлатнинг 246 нафар маҳоратли дзюдочилари талабномаларни тақдим этган.

Умумий мукофот жамғармаси 154 минг евродан иборат мазкур турнир жорий йилдан эътиборан “OTP Group Tashkent Grand Slam” деб аталиши белгиланди.

Тошкентда кечадиган нуфузли мусобақада Ўзбекистон шарафини 56 нафар спортчи ҳимоя қилади.

Халқаро турнирда иштирок этиш учун бир қатор давлатнинг терма жамоалари Ўзбекистонга етиб келди. Улар орасида Франция, Япония терма жамоалари аллақачон мусобақа олди машғулотларни Тошкентда ўтказмоқда.

“OTP Group Tashkent Grand Slam” турнири 28 февраль - 2 март кунлари бўлиб ўтади.

Эслатиб ўтамиз, аввалроқ Ўзбекистон, Тожикистон ва Қирғиз Республикаси Осиё кубогини ўтказиш бўйича қўшма ариза топширгани ҳақида хабар берган эдик.