Ўзбекистонда кичик ва ўрта бизнес 2028 йилгача янги тартиблардан ҳимояланади
TASHKENT. Kazinform - Ўзбекистонда 2025 йил 1 июлдан бошлаб кичик ва ўрта бизнес субъектлари учун соддалашган маъмурий тартиб-таомиллар жорий қилинади. Бу мамлакат президентининг 19 мартдаги қарорида кўзда тутилган.
Хусусан, 2028 йил 1 январга қадар кичик ва ўрта бизнес субъектлари зиммасига янги мажбуриятлар юклатилишини назарда тутадиган норматив-ҳуқуқий ҳужжатларни қабул қилишга мораторий эълон қилинади.
Тадбиркорларга янги тартибга солиш воситаларини белгилашни ёки амалдагиларини кучайтиришни назарда тутувчи норматив-ҳуқуқий ҳужжатларга нисбатан «ягона санадан янги қоидалар» тамойили қўлланади. Яъни ушбу нормалар 1 январь ёки 1 июлдан кучга киради.
Фавқулодда ҳолатларни бартараф этиш, фуқароларнинг ҳаёти ва соғлиғига зарар етказиш билан боғлиқ ҳолатларнинг олдини олиш, қонунчилик ҳужжатларини Жаҳон савдо ташкилоти қоидаларига мувофиқлаштиришга қаратилган чора-тадбирлар ушбу имтиёзлардан истисно ҳисобланади.
Бундан ташқари, 2028 йил 1 январга қадар «Биринчи имконият» тамойили жорий этилади ва унинг доирасида биринчи фаолият йили давомида савдо ва тадбиркорлик соҳаларига оид маъмурий ҳуқуқбузарликни илк бор содир этган кичик тадбиркорлик субъектлари маъмурий жавобгарликдан озод этилади.
2025 йил 1 сентябрдан бошлаб қуйидаги мезонларга бир вақтнинг ўзида жавоб берувчи кичик ва ўрта бизнес субъектларининг фаолиятини ихтиёрий равишда тугатишда солиқ текшируви ўтказилмайди:
охирги уч йилдаги умумий даромад 10 млрд сўмдан ошмаган;
бюджет ёки кредиторлардан қарзлари бўлмаган ва солиқ ҳисоботларини мунтазам равишда тақдим этадиган;
«Хавфни таҳлил қилиш» электрон тизимида ҳуқуқбузарлик содир этиш хавфи паст даражада таснифланган.
Эслатиб ўтамиз, аввалроқ Ўзбекистонда хусусий корхоналар сони 48 мингдан ошгани ҳақида хабар берган эдик.
