Ўзбекистонда болаларнинг «Док-1 Макс» сиропидан заҳарланишига сабабчи бўлганлар 20 йилгача озодликдан маҳрум этилиши мумкин
TASHKENT. Kazinform - Тошкент шаҳар суди 68 нафар боланинг ўлимига сабаб бўлган «Док-1 Макс» сиропи билан заҳарланиш бўйича ишни кўриб чиқишни якунламоқда, деб хабар беради Кazinform мухбири.
Ўзбекистон Ташқи ишлар вазирлиги ҳузуридаги “Дарё” агентлигининг 12 февраль куни хабар беришича, томонлар ўртасида бўлиб ўтган мунозарада прокурор суд жараёнида келтирилган далиллар туфайли айбланувчининг айби тўлиқ исботланганини таъкидлади.
Давлат айбловчиси судьядан ушбу сиропни Ўзбекистонга олиб келган расмий дилер, Quramax Medikal компаниясининг собиқ директори, ҳиндистонлик тадбиркор Рагневдра Пратарага 20 йил қамоқ жазосини сўради.
Ўзбекистон Фармацевтика тармоғини ривожлантириш агентлигининг собиқ раҳбари Сардор Қориевга нисбатан прокурор 18 йил қамоқ жазосини сўраган. Унинг икки ўринбосари учун ҳам бир хил муддат талаб қилди. Бундан ташқари, прокурор уларнинг ҳар бирини уч йил муддатга моддий жавобгар лавозимларни эгаллаш ҳуқуқидан маҳрум қилишни талаб қилди.
Суд мажлисида прокурор судланувчилардан ҳалок бўлган 68 нафар ва оғир жабрланган 16 нафар боланинг қариндошларига 100 миллион сўм, шунингдек, енгил жабрланган икки нафар боланинг ҳар бирига 20 миллион сўмдан ундиришни сўради.
Ҳиндистоннинг «Док-1 Макс» препаратидан 15 нафар боланинг ўлими ҳақидаги илк хабарлар 2022 йил декабрь ойи ўрталарида қайд этилгани аввалроқ маълум қилинган эди. Ўша йилнинг 27 декабрида Ўзбекистон Соғлиқни сақлаш вазирлиги «Док-1 Макс» препаратини қабул қилган 18 нафар боланинг ўлимини тасдиқлаган текширув натижаларини эълон қилди. 2023 йил август ойида бошланган суд жараёнида Ўзбекистон Олий суди жиноят натижасида жабрланганлар сони 65 нафар болага етганини маълум қилди.
