Ўзбекистон ва Эрон ўзаро товар айирбошлаш ҳажмини 2 млрд долларга етказади
TASHKENT. Kazinform – Ўзбекистон бош вазири Абдулла Арипов бошчилигидаги ҳукумат делегацияси расмий ташриф билан Эронда бўлиб, муҳим масалаларни ҳал этиш бўйича музокаралар ўтказди, деб хабар беради Kazinform агентлиги мухбири.
Теҳронда Эрон биринчи вице-президенти Муҳаммад Ризо Ареф ва Абдулла Арипов ўртасида бўлиб ўтган учрашувда икки давлат ўртасидаги келгуси ҳамкорлик масалалари муҳокама қилинди.
Хусусан, томонлар ўзаро товар айирбошлаш ҳажмини 2 миллиард долларга етказиш имкониятларини ўрганадилар. Шу мақсадда Ўзбекистон ва Эрон транспорт-логистика соҳасидаги кўп йиллик муаммоларни ҳал этишга алоҳида эътибор қаратиб, кучларни бирлаштиришга келишиб олди.
Айтиш жоизки, ўтган йили икки давлат ўртасидаги товар айирбошлаш ҳажми 500 миллион долларга етган. Айни пайтда 200 дан ортиқ қўшма корхона фаолият кўрсатмоқда.
Аввал хабар қилинганидек, АҚШ Эронга қарши қўшимча санкциялар киритди. Шунингдек, Уммонда расмий Теҳрон ва Вашингтон ўртасидаги ядровий музокаралар қайта бошланди.
