Ўзбекистон компаниялари Қозоғистонда сувни тежаш технологияларини жорий этиши мумкин
TASHKENT. Kazinform - Ўзбекистон компаниялари Қозоғистонда сувни тежаш технологияларини жорий этишда иштирок этиши мумкин, деб хабар беради Kazinform агентлиги мухбири.

Бу ҳақда Тошкентга амалий ташриф билан келган ва ўзбекистонлик ҳамкасби Шавкат Ҳамраев билан учрашган ҚР Сув ресурслари ва ирригация вазири Нуржан Нуржигитов маълум қилди.
«Ўзбекистонда сувни тежовчи технологияларни жорий этиш жадал давом этмоқда. Бу ерда махсус ахборот-таҳлил маркази мавжуд. Бугун унинг мутахассислари ҳисобот берди. Натижада икки томонлама келишувга эришдик. Шунга кўра, ходимларимиз март ойида Ўзбекистонга келиб, бу томоннинг иши билан танишади. Келажакда келишувга эришадиган бўлсак, Қозоғистонда сувни тежаш технологияларини жорий этиш билан Ўзбекистон компаниялари шуғулланиши мумкин», — деди вазир Kazinform мухбири саволига жавоб берди.
Қайд этиш жоизки, Ўзбекистон каналларни бетонлаш орқали сув сарфини 15 фоизга қисқартирган. Айни пайтда Қозоғистонда ҳам йирик лойиҳалар амалга оширилди. Вазирнинг таъкидлашича, 2028 йилгача мамлакатимизда 14,5 минг километрдан ортиқ суғориш тизими таъмирланади.
«Ўтган йилнинг ўзидаёқ узунлиги 400 километрдан ортиқ бўлган 80 та суғориш тизимини бетонладик. Айни пайтда 1531 километр узунликдаги зовурларни таъмирлаш ишлари олиб борилмоқда. Ҳукумат қарори билан 2024-2028 йилларга мўлжалланган комплекс режа тасдиқланди. Шунга кўра, 2028 йилгача 14,5 минг километрдан ортиқ суғориш тизимини таъмирлаймиз. Ҳисоб-китоб ҳужжатлари тайёр, жорий йилда республика бюджети ва Ислом тараққиёт банки ҳисобидан маблағ ажратилади», – дея хулоса қилди Нуржан Нуржигитов.
Вазирнинг сўзларига кўра, Қозоғистон ва Ўзбекистон сув тақсимоти бўйича келишув лойиҳаси устида ишламоқда.
Муаллиф: Алихан Асқар