Ўзбекистон халқаро автобус қатновларида йўловчиларнинг маълумотларини божхона постларига олдиндан етказиши мумкин
TASHKENT. Kazinform - Шавкат Мирзиёев божхона фаолиятини такомиллаштириш ва рақамлаштиришга оид тақдимот билан танишди. Бу ҳақда Kazinform ЎР президенти матбуот хизматига таяниб хабар беради.
Йиғилишда божхона соҳасида рақамлаштириш, жараённи тезлаштириш ва қулайлаштириш бўйича вазифалар кўплиги таъкидланди ва шу борадаги чора-тадбирлар кўриб чиқилди.
Маълум қилинишича, сўнгги йилларда божхона ҳудудида қайта ишлаш турлари кенгайтирилгани самарасида бу тарзда экспорт қилинган товарлар улуши ўтган йили 1 миллиард доллардан ошган. Бу тизимни яна ҳам соддалаштириб, шу йилнинг ўзида экспортни 1,5 миллиард долларга етказиш мумкин.
Қўшни давлатлар билан савдо ва туризм алоқалари кенгайиб бораётгани туфайли чегарадаги йўловчилар ва автотранспорт оқими камида 2 карра ошиши кутилмоқда. Бу қўшимча инфратузилма яратиб, постларда ўтказувчанликни оширишни талаб қилади.
Жумладан, халқаро қатновларни кўпайтириш мақсадида автобусларда ҳам, авиарейслардагидек, йўловчилар ҳақидаги маълумотларни олдиндан олиш тизими кўзда тутилмоқда. Натижада автобуслар чегарадан соддалашган тартибда ўтказилиб, расмийлаштириш вақти 2 баробар қисқаради. Шунингдек, энг йирик божхона постларида енгил автомобиль ва автобуслар учун қизил ва яшил йўлаклар жорий қилиш таклиф этилмоқда.
Божхона кузатувида сунъий интеллектни кенг қўллаш масаласига алоҳида эътибор қаратилди. Шу мақсадда Жаҳон банки мутахассислари кўмагида «хавф тизими» такомиллаштирилади.
Бу тизим молиявий барқарорлик, савдо тарихи каби 122 та мезон бўйича тадбиркорларнинг ишончлилик даражасини баҳолайди. Шунингдек, рентген тасвирлари сунъий интеллект асосида таҳлил қилиниб, хавфли товарлар автоматик аниқланади.
Шавкат Мирзиёев бу таклифларни маъқуллаб, соҳада фуқаролар учун енгилликлар яратиш, тадбиркорлар ва туристларга тезкор хизмат кўрсатиш зарурлигини таъкидлади. ЖСТга аъзо бўлиш жараёнида бунга божхона қонунчилигини тўлиқ мувофиқлаштириш вазифаси қўйилди.
Божхона институти салоҳиятини ошириш, сунъий интеллект, рақамли технологиялар, таҳлика-таҳлил бўйича малакали кадрлар тайёрлаш, дуал таълимни кенгайтириб, амалиётни яхшилаш муҳимлиги қайд этилди.
Эслатиб ўтамиз, аввалроқ Ўзбекистон 2026 йилда Жаҳон савдо ташкилотига аъзо бўлиши мумкинлиги ҳақида хабар берган эдик.
