Туркиялик компания Қозоғистондаги агролойиҳаларга 160 миллиард тенге инвестиция киритади

ASTANA. Kazinform – Қозоғистон ва Туркиянинг Tiryaki Holding компанияси 160 миллиард тенге миқдоридаги инвестиция бўйича келишувни имзолади. Бу ҳақда ҚР Қишлоқ хўжалиги вазири Айдарбек Сапаров маълум қилди.

Вазирнинг сўзларига кўра, Туркия ва Қозоғистон ўртасидаги икки томонлама ҳамкорлик изчил ривожланмоқда. Икки мамлакат ўртасидаги товар айирбошлаш ҳажми тахминан 300 миллион АҚШ долларини ташкил этади.

“Бугун биз Tiryaki Holding компанияси билан учрашиб, инвестиция келишувини имзоладик. Инвестиция миқдори – 160 миллиард тенге. Биринчи лойиҳа – бу ғалла маҳсулотларини чуқур қайта ишлаш бўлиб, унинг қиймати 110 миллиард тенгени ташкил этади. Иккинчи лойиҳа – дуккакли экинларни қайта ишлаш бўлиб, 50 миллиард тенгега тенг”, – деди Қишлоқ хўжалиги вазири ҚР Президенти Қасим-Жомарт Тоқаевнинг Анқарага расмий ташрифи доирасида турк бизнес вакиллари билан ўтказилган музокаралар натижалари юзасидан изоҳ берар экан.

Эслатиб ўтамиз, Қасим-Жомарт Тоқаев расмий ташриф билан Туркияга борди. Анқарадаги Эсенбога халқаро аэропортида Президент Тоқаевни Туркия Президенти Режеп Таййип Эрдоған кутиб олди.