Туркия Қозоғистоннинг гўшт маҳсулотларига қўйилган чекловларни олиб ташлади

ASTANА. Кazinform – 2024 йил 7 июндан бошлаб Қозоғистон маҳсулотларини Туркия бозорига олиб чиқишга тўсқинлик қилувчи бир қатор чекловлар олиб ташланди. 2005 йилдан бошлаб парранда гриппи, 2016 ва 2022 йилларда овсил ва нодуляр дерматит учун чекловлар қўлланилган, деб хабар беради Қозоғистон Республикаси Қишлоқ хўжалиги вазирлиги матбуот хизмати.

2024 йилнинг март ойида ҚР Қишлоқ хўжалиги вазири Айдарбек Сапаров Туркий давлатлар ташкилотига аъзо давлатлар вазирларининг Таразда бўлиб ўтган йиғилишида тўсиқлар масаласини кўтарган эди.

"Қозоғистон Туркия, Туркманистон ва Венгрия бозорларига юқори сифатли гўшт маҳсулотларини етказиб беришга тайёрлигини билдиради. Афсуски, бугунги кунда Туркия бозори ветеринария хизматлари соҳасида қозоғистонлик етказиб берувчилар учун амалда ёпиқ. Шуни таъкидлашни истардимки, жорий йилдан бошлаб, Қозоғистонга нисбатан бундай чекловлар ХХР ва Россия Федерацияси томонидан олиб ташланди. Шу муносабат билан Туркия томони билан ҳам бу масалани кўриб чиқишга қайтиш мумкин, деб ҳисоблаймиз”, — деди Айдарбек Сапаров Республика Туркия Қишлоқ хўжалиги вазири ўринбосари Гизлигидер Эбубекир билан тўсиқларни бартараф этиш масалалари бўйича бўлиб ўтган икки томонлама учрашувда.

Якуний қарор Жорий йилнинг май ойида Қозоғистон Республикаси Қишлоқ хўжалиги вазири ўринбосари А.Бердалиннинг Бутунжаҳон ҳайвонлар саломатлиги ташкилотининг 91-сессияси доирасида Туркия Қишлоқ хўжалиги вазири ўринбосари А.Гюмен билан ўтказган икки томонлама музокаралари натижасида қабул қилинди.

Туркия томони Қозоғистон томонидан тақдим этилган ҳисоботларни таҳлил қилиб, Жаҳон ҳайвонлар саломатлиги ташкилотига тақдим этди ҳамда мамлакатнинг ушбу касалликларга қарши курашиш ва бартараф этиш борасидаги саъй-ҳаракатларини юқори баҳолади. Ушбу қарор Қозоғистонда агробизнес учун янги истиқболларни очиб беради ва чорвачилик маҳсулотларига ветеринария талабларини мувофиқлаштириш имкониятларини кенгайтиради ва бу мамлакатлар ўртасидаги савдо алоқаларини мустаҳкамлашда муҳим қадам бўлади.