Туркистонда янги заводлар очилади
Хусусан, саноат ва махсус иқтисодий зоналар раҳбарияти билан қишлоқ хўжалиги техникасини йиғиш, кабель тармоғи ишлаб чиқариш, электромобилларни қувватлантириш шохобчалари, умумий қиймати 3 млрд тенгелик тикувчилик фабрикасини очиш бўйича меморандумлар имзоланди.
«Туркистон минтақаси Марказий Осиёда бизнесни кенгайтириш учун янги уфқдир. Қозоғистон ва Хитой ўртасидаги муносабатлар сўнгги йилларда мустаҳкамланиб боряпти. Ишончим комилки, бугунги кўргазма Қозоғистон-Хитой тадбиркорлари орасида ижобий натижалар беради. Хитойнинг бой тажрибаси Туркистон минтақаси салоҳиятини юксалтириш учун катта имкониятлар яратади. Бунгача Хитойга амалий ташриф билан бориб, бир қанча муҳим лойиҳаларни муҳокама қилдик. Бугунги учрашув ана шу ташриф натижасидир. Туманлар ҳокимларининг Хитойдаги йирик ишлаб чиқариш корхоналарига ташрифи, тажриба орттириш давом этяпти. Биз бу тажрибани умумлаштириб, вилоятда завод ва фабрикалар очиш ниятидамиз», - деди Туркистон вилояти ҳокими Дархан Сатибалди.
Томонлар минтақада тўқимачилик кластери ҳамда ишлаб чиқариш саноатида ип-калава, газлама ва гилам ишлаб чиқариш бўйича қўшма корхоналар ташкил этиш имкониятларини муҳокама қилди. Шунингдек, автомобилсозлик, электроника, рақамли технологиялар, робототехника, пластмасса буюмлар – пластик ўйинчоқлар, идиш-товоқлар ва бошқаларни ривожлантириш учун зарур бўлган лойиҳалар кўриб чиқилди. Транспорт-логистика инфратузилмасидан самарали фойдаланиш бўйича лойиҳаларни амалга ошириш бўйича тавсиялар берилди.
Маънавият пойтахтига илк бор ташриф буюрган Хитой делегацияси ўз таассуротлари билан ўртоқлашди ва ҳамкорликда ишлаш истагини билдирди. Делегацияга раҳбарлик қилаётган Мэн Сюй Ли ташрифдан кўзланган асосий мақсад Буюк Ипак йўли орқали савдони ривожлантириш, яъни Қозоғистон ва Хитой ўртасидаги савдо алоқаларини янада юқори даражага кўтариш эканини таъкидлади.
«Сизлар билан танишганимиздан жуда хурсандмиз. Биз бир қанча лойиҳаларни амалга оширишга тайёрмиз. Асосийси, аҳоли талабига кўра заводлар очиш. Туркистон вилоятида қишлоқ хўжалиги машиналарини йиғувчи завод қуриш мумкин. Кабель тармоқлари, электр транспорт воситаларини қувватлантириш станцияларини ишлаб чиқаришга, кийим-кечак фабрикасини очишга тайёрмиз. Туркистонни биринчи марта кўрганман. Шаҳарнинг гўзаллиги мени ҳайратга солди. Туркистоннинг келажаги порлоқ. Айтмоқчиманки, бу ерда туризмни ривожлантириш йўналишида иш олиб бориш мумкин. Умуман олганда, бу лойиҳалар икки томонлама ҳамкорлигимизнинг бошланиши, холос», - деди Мэн Сюй Ли.
Йиғилишда Қозоғистон ва Хитой ўртасидаги савдо айланмаси ҳажмини оширишга мўлжалланган онлайн платформа тақдим этилди. «Илтун» деб номланган савдо майдончасининг асосий афзаллиги товарни ишлаб чиқарувчидан тўғридан-тўғри сотиб олиш имкониятидир. Платформанинг мақсади товарлар нархини пасайтириш, сифатини яхшилаш ва спекуляция сонини камайтиришдир.
Туркистонда икки давлат ишлаб чиқарувчилари кўргазмаси бўлиб ўтяпти. Ҳудудга сармоя жалб этиш ва маҳаллий маҳсулотларни экспорт қилишдан кўзланган мақсадли тадбирда 60 га яқин товар ишлаб чиқарувчи корхоналарнинг маҳсулотлари: кийим-кечак, пойабзал, идиш-товоқ, тўқимачилик, электр машиналар, қуёшдан ҳимояловчи воситалар, электроскутерлар, озиқ-овқат, мебель, кимё, енгил саноат, қурилиш саноати маҳсулотлари, ҳунармандлар.
Туркистон вилояти бир неча йўналишда минтақалараро ҳамкорликни ривожлантириш учун юқори салоҳиятга эга.
Биринчидан, ишлаб чиқариш саноатида тўқимачилик кластерида ип-калава, газлама, гилам ишлаб чиқариш бўйича қўшма корхоналар ташкил этиш учун катта имконият мавжуд. Шунингдек, пластмасса буюмлар, ўйинчоқлар, идиш-товоқлар, автомобилсозлик, электроника, рақамли технологиялар ишлаб чиқаришни ривожлантириш мумкин.
Иккинчидан, Туркистон вилояти қишлоқ хўжалиги маҳсулотларини етиштириш бўйича республикада етакчи ўринлардан бирини эгаллайди. Қорамол ва майда қорамол гўшти экспорти ҳажми 80 фоизни, мева экспорти эса 26 фоизни ташкил этади. Бугунги кунда вилоятда ғалла, мева-сабзавот, полиз ва гўшт-сут маҳсулотларини чуқур қайта ишлаш устувор йўналиш ҳисобланади. Асосий инвестиция мажмуалари тайёр инфратузилмага эга саноат зоналари ва иштирокчиларга турли солиқ имтиёзлари тақдим этувчи «Туркистон» махсус иқтисодий зонаси ҳисобланади. Махсус иқтисодий зона 4000 гектар майдонда жойлашган бўлиб, олтита кичик ҳудуддан иборат: тарихий-маданий марказ (862 гектар), маъмурий ва ишбилармонлик маркази (1580 гектар), учта саноат зонаси (365 гектар – Орангай, 180 гектар – Туркистон, 35 га - Кентау) ва аэропорт (967 га).
Учинчидан, туризмни ривожлантириш вилоят иқтисодиётининг устувор йўналишларидан биридир. Шундай қилиб, сўнгги уч йилда вилоятда туризмга йўналтирилган инвестициялар ҳажми қарийб 600 миллион долларни ташкил этди, ундан ташқари ҳар йили хорижий давлатлардан сайёҳлар оқимининг ортиши кузатилмоқда.
Ташриф доирасида Хитой делегацияси «Туркистон» саноат зонаси ва махсус иқтисодий зонаси фаолияти билан танишди.
