Турк давлатчилиги тарихининг II конгреси Жўжи улусининг 800 йиллигига бағишланди
ALMATY. Kazinform – Алмати шаҳрида “Чингизхон даврида туркий халқларнинг давлатчилиги” мавзусида Турк давлатчилиги тарихининг II конгреси бўлиб ўтди. Конгресс туркий дунё ва бутун Евроосиё тарихида муҳим ўрин тутган буюк Жўжининг 800 йиллигига бағишланган.
Халқаро тадбир Туркий тиллар академияси ва ҚР Фан ва олий таълим вазирлигининг Жўжи улусини ўрганиш илмий институти ҳамкорлигида ташкил этилди. Конгрессда туркий давлатларнинг етакчи олимлари ва дипломатик корпус вакиллари, шунингдек, Мўғулистон, Корея, Россия, АҚШ, Австрия, Болгария ва Украинадан келган иштирокчилар иштирок этди.
Туркий тиллар академияси раҳбари Шаҳин Мустафоев очилиш маросимида бундай тадбир илмий ҳамкорликни мустаҳкамлаш, туркий халқлар тарихига холис, фактик ёндашишни тарғиб қилишга хизмат қилишини таъкидлади.
“Тарих миллий ўзига хосликнинг асосидир. Бироқ тарихий фактларнинг бузиб кўрсатилиши қардош халқлар ўртасида низолар келтириб чиқариши мумкинлигини кўришимиз мумкин. Бизнинг вазифамиз бундай манипуляцияларнинг олдини олиш ва барча туркий халқлар учун тушунарли бўлган ҳисоботларни тайёрлашдир”, — деди Ш. Мустафоев.
Конгрессда туркий халқларнинг сиёсий тарихига, маданияти ривожига катта таъсир кўрсатган Чингизхон даври асосий мавзу бўлди.
“Чингизхон даври туркий халқларнинг сиёсий ва этник тарихига катта таъсир кўрсатди. Унинг аҳамиятини ортиқча баҳолаб бўлмайди — бу умумий туркий макон халқларини глобаллашувнинг янги даврига етаклаган давр эди”, – деди академия президенти.
Икки кун давом этган конгрессда олимлар томонидан Чингизхон давридаги туркий давлатлар тарихининг турли жиҳатларига оид маърузалар тингланди. Хулоса сифатида иштирокчилар қўшма декларация қабул қилиб, туркий халқлар давлат тарихини ҳар томонлама ва кўп қиррали ўрганиш муҳимлигини таъкидладилар.
Ҳужжатда тарих, археология, этнография, туркология, популяция генетикаси каби турли илмий йўналишлар вакиллари ўртасида қўшма тадқиқотларни фаоллаштириш зарурлиги кўрсатилган. Шу билан бирга Туркий Академия конгрессда ўқилган маърузалар тўпламини нашр этади.
