Trump Media 2 миллиард долларлик биткойн захираси тўплади
WASHINGTON. Kazinform – Trump Media and Technology Group компанияси биткойн ва унга боғлиқ қимматли қоғозларда тахминан 2 миллиард долларлик захира тўплаганини маълум қилди.
CNBC тарқатган маълумотларга кўра, ҳозирги пайтда биткойндаги активлар Trump Media компаниясининг умумий ликвид активларининг учдан икки қисмини ташкил қилмоқда.
Компания акциялари Nasdaq биржасида DJT тикери остида сотилади. Forbes таҳлилига кўра, Дональд Трампнинг ушбу компаниядаги улуши қарийб 2,3 миллиард долларга тенг. Биткойн ва криптовалюта лойиҳалари эса ҳозирда Трамп ва унинг оиласи бойлигининг асосий қисмини ташкил қилмоқда.
Трамп криптовалюта соҳасидаги бир қатор лойиҳалардан миллионлаб доллар ишлаган. Жумладан, World Liberty Financial номли марказлашмаган молиявий ташкилот ва $TRUMP мем-монетасининг дастлабки чиқарилиши унга катта даромад келтирган. Бу танга Трампнинг инаугурациясига бир неча кун қолганда жорий этилган эди.
«Бу активлар компаниямизнинг молиявий эркинлигини таъминлашга ёрдам беради, молиявий муассасалар томонидан бўлиши мумкин бўлган таассубкор муносабатлардан ҳимоялайди ва Truth Social экотизимида жорий қилишни режалаштираётган утилитар токен билан синергия яратади», – деди Trump Media бош директори Девин Нуньес.
Компания маълум қилишича, у биткойнга боғлиқ қимматли қоғозлар учун опционлар харид қилиш стратегияси доирасида 300 миллион доллар ажратган. Trump Media биткойн сотиб олишни давом эттиришни режалаштирмоқда.
Аввалроқ Trump Media компанияси, яъни Truth Social иловасига эгалик қилувчи тузилма, май ойида криптовалюта захирасини шакллантириш мақсадида 2,5 миллиард доллар жалб қилиш ниятида эканини эълон қилган эди. 2 миллиард долларлик биткойн хариди компаниянинг “биткойн-хазина режаси”нинг бир қисми ҳисобланади.
