Трамп ўз президентлик муддати тугагунига қадар «Олтин гумбаз» тизимини яратишни режалаштирмоқда
ASTANA. Kazinform – АҚШ Президенти Дональд Трамп ракеталарга қарши мудофаа тизими – «Олтин гумбаз» лойиҳасини яратиш режаларини эълон қилди. Унинг айтишича, ушбу тизим президентлик муддати якунлангунига қадар ишга туширилади, деб хабар беради The New York Times.
Трамп президентлик лавозимига киришган пайтдан бери «Олтин гумбаз» лойиҳасини устувор йўналиш деб ҳисоблаб келади. Сайловолди кампанияси давомида у Исроилнинг ракета ва снарядларни йўқ қилишга мўлжалланган «Темир гумбази»га ўхшаш ташқи таҳдидлардан ҳимоя қилиш тизимини яратишни ваъда қилган эди.
Трампнинг баҳолашича, лойиҳа тахминан 175 миллиард долларга тушади. Аммо Конгресснинг бюджет бошқармаси ушбу ракетага қарши мудофаа тизими анча қиммат – 542 миллиард долларгача бўлиши мумкинлигини қайд этган.
Трамп сешанба куни маълум қилишича, «Олтин гумбаз» лойиҳасига унинг солиқ ва харажатларни қисқартиришга қаратилган қонуни орқали 25 миллиард доллар ажратилади. Бу қонун ҳали Конгресс томонидан тасдиқланиши керак. Шунингдек, Канада мазкур дастурда иштирок этишга қизиқиш билдирган ва тизим харажатларининг бир қисмини ўз зиммасига олиши мумкин.
Трамп АҚШ ушбу лойиҳани тахминан уч йил ичида амалга ошириши ва президентлик муддати тугагунига қадар тўлиқ қувватда ишга туширишга эришишига ишонч билдирди.
«Олтин гумбаз» тўлиқ қуриб битказилгандан сўнг, у ҳатто дунёнинг исталган нуқтасидан, ҳатто фазодан отилган ракеталарни ҳам йўқ қила олади. Бу тарихдаги энг кучли мудофаа тизими бўлади”, – деди Дональд Трамп.
Трамп, шунингдек, лойиҳани АҚШ Космик кучлари раҳбарининг ўринбосари генерал Майкл Гетлейн назорат қилиши ҳақида маълум қилди.
Трамп январда «Америка Темир гумбази» номли фармонни имзолаган эди. Унда Пентагонга 60 кун ичида лойиҳанинг батафсил режасини тақдим этиш вазифаси юклатилган. Режа Америка гипертовушли ракеталари ва «фазовий тўсқинлик воситалари»ни яратишни ҳам ўз ичига олади.
Ушбу лойиҳа Трампга собиқ президент Рональд Рейганнинг орзусини рўёбга чиқариш имконини беради. Рейган 1980 йилларда эҳтимолий ядровий ҳужумга қарши курашиш учун миллиардлаб маблағни «Юлдузли урушлар» деб номланган мудофаа тизимига сарфлаган, бироқ лойиҳа технологик ва молиявий муаммолар туфайли амалга ошмай қолган эди.
