Трамп: АҚШ Эрон олий раҳбари қаерда эканини «аниқ билади»
WASHINGTON. Kazinform – АҚШ президенти Дональд Трамп Эроннинг олий раҳбари Оятуллоҳ Али Хоманаий қаерда эканини «аниқ билади» ва ҳозирча унга тегмасликка қарор қилганини маълум қилди. Бу ҳақда New York Post хабар берди.
“Биз «олий раҳбар» қаерда эканини аниқ биламиз. У – енгил нишон, лекин ҳозир у хавфсиз жойда. Биз уни чиқариш (ўлдириш) ниятида эмасмиз, ҳеч бўлмаса ҳозирча. Бироқ биз тинч аҳоли ва америкалик аскарларга ракета отилишини истамаймиз. Сабримиз тугаб бормоқда”, – деди Дональд Трамп.
Президентнинг сўзларига кўра, ўтган ҳафта охирида у Исроилнинг Хоманаийни йўқ қилиш режасига вето қўйган, шунга қарамай, ҳам у, ҳам Исроил Бош вазири Биньямин Нетаньяху Теҳрон ядровий дастуридан воз кечишини кутишда тоқати тугаётганини яширмади.
Бу орада, 2025 йил март ойида АҚШ разведка раҳбари Тулси Габбард Эрон ҳали ҳам ядровий бомба яратишдан узоқ эканини билдирган эди – бу эса Нетаньяхунинг даъволарига зиддир.
Реза Пехлевий халқни қўзғолонга чақирди
Шунингдек, Эроннинг сўнгги шоҳи Муҳаммад Реза Пехлевийнинг 64 ёшли ўғли – Реза Пехлевий сешанба куни ўз чиқишида эронликларни ҳукуматни ағдариш учун умуммиллий қўзғолонга чақирди.
“Тизимнинг репрессия аппарати емирилмоқда. Энди бу тушкунликка барҳам бериш учун умуммиллий қўзғолон керак. Ҳозир – қўзғолон қилиш вақти, Эронни қайтариш вақти”, – деди Пехлевий.
Унинг таъкидлашича, Эрон фуқаролик уруши ёки беқарорлик сари оғмайди.
“Бизда Эроннинг келажаги ва фаровонлиги учун аниқ режа бор. Қулаганидан кейинги дастлабки юз кунга, ўтиш даврига ва миллий-демократик ҳукумат барпо этишга тайёрмиз”, – деди у.
