Трамп 2028 йилда президентликка номзодини қўйиши мумкин

ASTANA. Kazinform – АҚШ президенти Доналд Трамп кўпчилик ундан 2028 йилда яна президентликка ўз номзодини қўйишни сўрашаётганини ва у буни кўриб чиқишини айтди, деб ёзади ТАСС.

«Биласизлар, биз қайта сайланишни хоҳлаймиз. Кўпчилик бунга маслаҳат бераяпти. Бу ҳақда ўйлаб кўраман, гарчи бу жуда қийин иш», – деди у Қатардаги «Ал-Удейд» америкалик ҳарбий базасида чиқиш қилиб.

Америка раҳбари ушбу фикрни ҳазил шаклида айтди ва эҳтимолий сайловолди кампанияси учун шиор сифатида қуйидагини таклиф қилди: «Трамп-2028: чап қанотдагиларни ақлдан оздирамиз».

Шу билан бирга, Трамп бундан аввал учинчи марта давлат раҳбари лавозимига сайланиш нияти йўқлигини билдирган эди.

АҚШ Конституциясига 1951 йилда киритилган 22-ўзгартиришга мувофиқ, бир шахс икки мартадан ортиқ президент этиб сайланиши мумкин эмас. АҚШдаги навбатдаги президентлик сайловлари 2028 йилда бўлиб ўтади.

Бунгача 20 штат Трамп маъмуриятини судга берганини ёздик.