Тожикистонда 200 та қор кўчкиси, 7 та кўчки ва 6 та тош қулаши юз берди: 19 киши қурбон бўлди
19 феврал куни Душанбе-Кўлоб-Дарваз автомобил йўлининг 327-километрида, Кўлоб-Дарваз-Ванч автомобил йўлининг 425, 426, 427, 447, 448-км, Ванч-Рушон-Хоруғ автомобил йўлининг 554-километрида, шунингдек «Хоруғ – Роштқалъа» автомагистралининг 12 километрида ТБАО ҳудудида қор кўчкилари содир бўлди, ушбу магистралларнинг участкаларида ҳаракат ёпилди. Транспорт вазирлиги ходимларининг саъй-ҳаракатлари билан махсус техникалар жалб қилинган ҳолда Ванч ва Рушон туманлари ҳудудлари қор кўчкиси оқибатларидан тозаланди, Дарваз ва Роштқалъа туманларида ишлар давом этмоқда.
15 февралдан 19 февралгача Тожикистонда 200 та қор кўчкиси, 7 та кўчки ва 6 та тош қулаши кузатилди. Қор кўчкилари оқибатида 19 нафар мамлакат фуқароси ҳалок бўлди.
Гидрометеорология агентлиги маълумотларига кўра, республика ҳудудида 21 февралгача юқори қор кўчкиси, сел, кўчки ва тош тушиши хавфи сақланиб қолади.
Қўмита аҳолига шу кунларда овга, балиқ овлашга бормаслик, яйловларда мол боқишдан воз кечиш тавсиясини яна бир бор билдиради.
Асосий шахсий хавфсизлик чораларига риоя қилиш, тоғларда сайр қилишдан бош тортиш муҳимдир.
Шу кунларда уйлар яқинида жойлашган ариқлар, ёплар, сел оқимларини тозалаш муҳим аҳамиятга эга.
Тожикистон ҳукумати ҳузуридаги Фавқулодда вазиятлар ва фуқаролик мудофааси қўмитаси 16 феврал куни мамлакат ҳудудига 69 та қор кўчкиси тушгани ҳақида маълумот эълон қилди. Чоршанба куни Тожикистоннинг Тоғли Бадахшон вилояти ва Варзоб туманида бир неча қор кўчкиси тушиб, 17 киши ҳалок бўлди. Энг кўп қурбонлар ТБАО маъмурий маркази – Хоруғ шаҳрига тўғри келди, у ерда уйлар вайрон бўлган қор кўчкиси остида 13 киши ҳалок бўлди, улар орасида бир нечта болалар ҳам бор. Жума куни 18 қурбон ҳақида хабар берилган.
Фото: khovar.tj