Тошкентда Қозоғистоннинг, Астанада Ўзбекистоннинг савдо маркази қурилиши мумкин
ТASHKENT. Кazinform – Қозоғистоннинг Ўзбекистондаги элчихонасида ушбу мамлакатда ишлаётган қозоғистонлик тадбиркорлар билан учрашув бўлиб ўтди, деб хабар беради Kazinform агентлиги мухбири.
Учрашувда икки давлат ўртасидаги иқтисодий алоқаларни мустаҳкамлашга туртки бўладиган лойиҳаларни биргаликда амалга ошириш имкониятлари кўриб чиқилди.
Ўзбекистон Савдо-саноат палатаси раиси ўринбосари Дилшод Расулов таъкидлаганидек, ўтган йили Ўзбекистон Ақтау шаҳрида дистрибьюторлик маркази очган эди. У орқали Тошкент Қозоғистон бозорига қишлоқ хўжалиги маҳсулотларини, жумладан, озиқ-овқат маҳсулотларини расман экспорт қилади. Шунингдек, ушбу хабдан бошқа мамлакатларга экспорт қилинаётган Ўзбекистон маҳсулотларини вақтинча сақлаш учун фойдаланиш режалаштирилган.
– Бундан ташқари, ўтган ёзда Қозоғистонда ҳукуматлараро комиссия йиғилишини ўтказдик. Унинг доирасида Астана ҳокими билан учрашув ташкил этилди ва меморандум имзоланди. Ўша ҳужжатга кўра, Ўзбекистон томонига пойтахтдан ер, худди шундай тартибда Тошкент шаҳридан Қозоғистон учун ер ажратиш кўзда тутилган. Савдо марказлари ўша майдончаларда қурилиши керак. Кейинчалик бу орқали Ўзбекистон товарларини Астанада, Қозоғистон маҳсулотларини эса Тошкентда сотиш мумкин бўлади, — деди Дилшод Расулов режалар ҳақида.
Эслатиб ўтамиз, Ўзбекистонда Қозоғистон капитали иштирокидаги мингдан ортиқ корхона фаолият юритмоқда. Айни пайтда икки давлат ўртасидаги ҳудудлараро алоқалар мустаҳкамланмоқда.
Муаллиф: Алихан Асқар
