Сурия ва Ироқдаги лагерларда 60 мингга яқин фуқаро асрликда қолмоқда – БМТ
TASHKENT. Kazinform – Ҳисоб-китобларга кўра, Сурия ва Ироқ шимоли-шарқидаги лагерларда 55-60 мингга яқин фуқаро асрликда қолмоқда. Бу ҳақда БМТ Бош котиби ўринбосари Владимир Воронков Ўзбекистон пойтахтида бўлиб ўтган уруш зонасидан қайтганларни реабилитация қилиш бўйича минтақавий экспертлар кенгашида маълум қилди, деб хабар беради Kazinform агентлигининг Тошкентдаги мухбири Алихан Асқар.
Кенгашнинг биринчи йиғилишида реабилитация дастурини амалга оширувчи давлат органлари раҳбарлари, эксперт ва психологлар иштирок этди.
Қозоғистон делегациясига Маданият ва ахборот вазири ўринбосари Қанат Искаков бошчилик қилди. У ўз нутқида халқаро ташкилотлар билан ҳамкорликда ўтказилган “Жусан” операциясининг муҳимлигини таъкидлади. Унинг доирасида Қозоғистонга 180 нафар аёл, 500 дан ортиқ бола ва 37 нафар эркак қайтарилди. Етим қолган 34 нафар бола ўз яқинларини топди.
Мутахассисларнинг фикрича, Қозоғистонда аёллар ва болаларни реабилитация қилиш, фуқароликни тиклаш ва юридик ёрдам кўрсатиш масалалари тизимли равишда амалга оширилмоқда.
“Бугун айтиш мумкинки, АҚШ, Европа ва Марказий Осиё давлатлари томонидан амалга оширилган реабилитация дастурининг натижалари жуда катта. Энди аёллар ва болалар жамият ва давлат учун ҳеч қандай хавф туғдирмайди, дейишга асос бор. Барча болаларни бобоси ва бувиси тарбиялаган. Бу болалар мактабда ўқийдилар. Асосий вазифа – болани аёлдан ажратмаслик, уларни меҳрибонлик уйига бермаслик”, – деди қозоғистонлик психолог, Суриядан қайтган аёлларни реабилитация қилиш дастури миллий эксперти Гулназ Раздиқова.
Шунингдек, йиғилишда БМТ Бош котиби ўринбосари, Терроризмга қарши кураш департаменти раҳбари Владимир Воронков жаҳон давлатларининг кўплаб фуқаролари ҳали ҳам уруш зоналарида қолаётганини айтди.
“Афсуски, Сурия ва Ироқ шимоли-шарқидаги лагерларда кўплаб давлат фуқаролари асрликда қолмоқда. Бизнинг ҳисоб-китобларга кўра, уларнинг сони 55-60 мингга етади. Аввало, биз аёллар ва болалар ҳақида гапирамиз. Уларни ўз мамлакатларига қайтариш, нормал ҳаётга мослаштириш борасида кўп иш қилиш керак. Шу нуқтаи назардан, Марказий Осиё давлатларининг тажрибаси жуда муҳим”, – деди Владимир Воронков.
Бундан ташқари, экспертлар “Жусан” каби гуманитар операциялар Марказий Осиёнинг бошқа давлатлари томонидан ҳам амалга оширилганини қайд этишди. Масалан, Ўзбекистон 531 нафар, Қирғизистон 511, Тожикистон 381 фуқароси хавфсиз жойларга кўчирилди.
