Серик Жуманғарин Президентга қозоғистонликларни маҳаллий озиқ-овқат билан таъминлаш чора-тадбирлари тўғрисида маълумот берди

ASTANА. Каzinform – Давлат раҳбари Қасим-Жомарт Тоқаев Бош вазир ўринбосари – Савдо ва интеграция вазири Серик Жуманғаринни қабул қилди, дея хабар беради Ақорда матбуот хизмати.

Президентга ўтган йили мамлакат савдо соҳасини ривожлантириш якунлари, нархларни барқарорлаштириш ва қозоғистонликларни маҳаллий озиқ-овқат маҳсулотлари билан тўлиқ таъминлаш бўйича Ҳукумат чора-тадбирлари, шунингдек, қишлоқ хўжалигини ривожлантириш бўйича таклифлар ҳақида маълумот берилди.

Серик Жуманғариннинг сўзларига кўра, 2022 йилда Қозоғистондаги умумий савдо ҳажми 134,4 миллиард долларни ташкил этади. Бу кўрсаткич 2021 йилга нисбатан 32,1 фоизга кўпдир. Хизмат кўрсатиш савдоси 26,3 фоизга ошиб, 12,3 миллиард долларни ташкил этди. Қозоғистоннинг барча асосий савдо ҳамкорлари билан товар айирбошлаш ҳажмининг ўсиши кузатилмоқда.

Қайта ишланган маҳсулотлар экспорти 26,5 миллиард долларни ташкил этиб, мисли кўрилмаган даражага етди. Чуқур қайта ишланган экспорт товарлари рўйхати кенгайиб, маҳаллий маҳсулотлар янги экспорт бозорларига чиқди.

Қасим-Жомарт Тоқаевга мамлакатда ижтимоий аҳамиятга эга озиқ-овқат маҳсулотларини ишлаб чиқариш ҳолати ҳақида сўзлаб берилди. Қозоғистон резидентларнинг 19 та маҳсулотдан 10 таси бўйича тўла, 6 та маҳсулотга 80-98 фоизга, яна учта маҳсулотга 50-68 фоизга бўлган эҳтиёжини қондиради. Импортга қарамликни минималлаштириш мақсадида келгусида ҳудудларда амалга ошириладиган йирик қишлоқ хўжалиги лойиҳалари мажмуаси ишлаб чиқилади.

Учрашув якунида Давлат раҳбари ижтимоий аҳамиятга эга озиқ-овқат маҳсулотлари нархини барқарорлаштириш, қишлоқ хўжалигини ривожлантириш, юқори қўшимча қийматга эга Қозоғистон товарларини фаол экспорт қилиш бўйича топшириқлар берди.