Сенат Қозоғистон ва Ўзбекистоннинг экологик ташаббуслари тўғрисидаги ҳужжатни маъқуллади
ASTANА. Кazinform - Бугун Сенатнинг ялпи мажлисида “Қозоғистон Ҳукумати ва Ўзбекистон Ҳукумати ўртасида экология ва атроф-муҳитни муҳофаза қилиш соҳасида ҳамкорлик тўғрисидаги битимни ратификация қилиш тўғрисида”ги Қонун маъқулланди.
Ушбу битим 2022 йил 22 декабрда Тошкент шаҳрида имзоланган. Битим Қозоғистон Республикаси ва Ўзбекистон Республикаси ўртасида атроф-муҳитни муҳофаза қилиш соҳасидаги ҳамкорликни ривожлантириш ҳамда тегишли равишда экология ва атроф-муҳитни муҳофаза қилиш соҳасидаги дўстона муносабатларни мустаҳкамлашга қаратилган.
Сенатнинг Аграр масалалар, табиатдан фойдаланиш ва қишлоқ хўжалигини ривожлантириш масалалари қўмитасидан маълум қилишларича, мазкур ҳужжат доирасида атмосфера ҳавоси ифлосланишининг олдини олиш ва назорат қилиш, сув ифлосланишининг олдини олиш, биологик хилма-хилликни сақлаш, экотизимни деградациядан ҳимоя қилиш ва қум бўронларининг олдини олиш ва бошқа масалалар ҳисобга олинади.
Бундан ташқари, Битим Орол ҳавзасидаги экологик вазиятни яхшилаш бўйича қўшма чора-тадбирлар ишлаб чиқишни назарда тутади. Мазкур халқаро ҳужжат доирасида атроф-муҳит мониторинги соҳасида қўшма илмий-тадқиқот фаолиятини амалга ошириш масалалари бўйича қўшма конференциялар, давра суҳбатлари, учрашувлар, шунингдек, ишчи гуруҳларни ўтказиш режалаштирилган.
“Юқорида қайд этилган Битим атроф-муҳитни муҳофаза қилиш ва ўрмон майдонларини тиклашни ташкил этиш, шунингдек, мониторинг, жумладан, тупроқ ва ўсимликларнинг деградациясига қарши курашиш бўйича ҳамкорликни такомиллаштириш имконини беради. Ҳужжат биргаликда сувдан намуна олиш, таҳлил қилиш ва сув сифати маълумотлари ҳамда меъёрий ҳужжатлар билан алмашишга қаратилган. Ўзбекистон томони билан Орол ҳавзасидаги экологик вазиятни яхшилаш бўйича қўшма тадбирлар ўтказиш муҳим воқеа, деб ўйлайман. Шу муносабат билан мазкур Битимнинг қабул қилиниши икки давлатнинг Орол денгизи ва Орол минтақасини тиклаш, шунингдек, ушбу соҳадаги халқаро ва минтақавий дастурларни ишлаб чиқиш ва амалга оширишдаги саъй-ҳаракатларини бирлаштиради ва мувофиқлаштиради. Саксовул экиш Қозоғистон ва Ўзбекистон томонларнинг Орол денгизи экологик инқирози оқибатларини юмшатиш, қум-туз бўронларининг олдини олиш бўйича ҳаракатларини мувофиқлаштириш имконини беради”, - деди сенатор Жанболат Жўргенбаев.
