Россиянинг Екатеринбург шаҳрида Қозоғистоннинг Бош консуллиги очилди

None
Фото: primeminister.kz
ASTANA. Kazinform – ҚР Бош вазири Алихан Смаилов XIII «ИННОПРОМ» халқаро саноат кўргазмасида иштирок этиш учун Екатеринбург (РФ) шаҳрига амалий ташриф билан борди, дея хабар беради Kazinform primeminister.kzга таяниб.

Ҳукумат раҳбари, биринчи навбатда, шаҳардаги Қозоғистоннинг Бош консулхонасининг очилиш маросимида иштирок этди.

Бош консулхонанинг фаолияти Қозоғистон Республикаси ҳудудлари ва корхоналарининг Россия Федерацияси ҳудудлари билан савдо-иқтисодий ва маданий-гуманитар ҳамкорлигини кенгайтиришга, шунингдек, тегишли консуллик хизматларидан фойдаланиш имкониятларини оширишга қаратилган.

Янги дипломатик муассасанинг иши Урал федерал округининг бутун ҳудудини, хусусан, Свердлов, Челябинск, Қорған, Тюмень областлари, шунингдек, Пермь областини қамраб олади.

Умуман олганда, ушбу консуллик округи ҳудудида 90 мингдан ортиқ қозоқлар, жумладан, Қозоғистондан келган 7 мингдан ортиқ талаба истиқомат қилади.

Маросимда Бош вазир Алихан Смаилов ва Свердлов области губернатори Евгений Куйвашев қизил лентани кесиб, сўнг Бош консуллик биносига ташриф буюрди.

Бош вазирнинг сўзларига кўра, Уралнинг қоқ марказида Бош консулхонанинг очилиши дўстона муносабатларимиз ривожига сезиларли суръат бағишлайди.

Шу билан бирга, Ҳукумат раҳбари бундан 10 йил аввал Екатеринбургда икки давлат президентлари имзолаган ХХІ асрда яхши қўшничилик ва иттифоқчилик тўғрисидаги шартнома доирасида стратегик шерикликни янада мустаҳкамлаш чора-тадбирлари фаол давом этаётганини таъкидлади.

«Бугунги кунда Қозоғистон вилоятлари ва шаҳарлари Россиянинг аксарият субъектлари билан доимий мулоқот ўрнатган. Шу нуқтаи назардан, Урал вилояти географик яқинлик нуқтаи назаридан ҳам, саноат ривожланган Свердлов, Қорған, Тумень, Челябинск областлари ва Пермь области билан савдо-иқтисодий алоқалар нуқтаи назаридан ҳам жуда муҳим», - деди Алихан Смаилов.

Нутқ сўнгида Бош вазир Қозоғистон Республикаси Бош консуллиги давлатлараро ҳамкорликни ривожлантириш учун янги имкониятлар очишига ишонч билдирди ва унинг ходимларига муваффақиятлар тилади.


Сўнгги хабарлар